Shillong, Lber 15: Ka iing dorbar jong ka jylla Meghalaya mynta ka sngi kala kyntait ia ka “Privilege Motion” pyrshah ia u Conrad K Sangma Myntri Rangbah ka jylla ia kaba la wanrah da u Zenith M Sangma MLA ka seng Congress da ka shim da ka ‘Voice Vote’.
U Lamphang ka iing dorbar u bah Metbah Lyngdoh, ha dien ba la kut ka por kylli jingkylli, u la pyntip hapoh ka iing dorbar ba mynta ka sngi ha ka por 9.00 baje mynstep la iohpdiang ia ka jingthoh ba la wan rah ia ka “Privilege motion” pyrshah ia u Mytnri Rangbah ka jylla.
Ia kane la wan rah hapoh ka Rule jong ka rukom pyniaid ia ka iing dorbar, na ka liang jong u Lamphang, u la ai lat ia u Zenith M Sangma nongwanrah ia ka motion ban pynsngew hapoh ka iing dorbar haba ia dei bad kane ka Privilege Motion.
Haba kren hapoh ka iing dorbar halor kane ka Privilege motion, ba la wan tah ia kane dei halor ka jubab jong u myntri rangbah hapoh ka iing dorbar ha ka 9/03/2021 ha kaba ia dei bad ka jingsiew sha ka NTPC , Rs. 11 klur, Rs. 133 klur bad kan kot sha ka T.3325 klur ha ki 25 snem.
U Zenith M Sangma MLA u la pynsngew hapoh ka iing dorbar ba ha ka jingiasoi soskular kam shym don kata ka jingthoh kaba ong hap ban siew pisa, kane ka jingkren u myntri rangbah ka jylla kala ialam bakla ia ka iing dorbar.
U Mytnri Rangbah ka jylla u Conrad K Sangma haba jubab ia ka jingkren jong u Zenith M Sangma MLA bala wanrah ia ka “Privilege Motion” la ong ba kane ka mih na ka daw jong ka pynlip light jong ka NTPC mynta u bnai Lber 2021.
Halor ka jingkren jong u ba ka sorkar ka hap ban siew T.11.08 klur ka dei halor ka bill kaba la ai da ka NTPC sha ka sorkar jylla bad kane ka jingkhien lada ka iaid bad ha ki 25 snem kan poi sha kata ka jingkhein kaba la khein, hato dang nud ban ong ba kam kata kata ka jingsiew sha ka NTPC.
Kumba ka long mynta ka sorkar kala dew siew T.100 klur wat la la dep ban siew ia katei ka pisa kaba dang sah ka long T.531 klur ia kaba dang hap ban siew sha ka NTPC bad kane ka jngsiew ka mih na katei ka jingiateh kular kaba la leh ha u snem 2007.
Ha dien ba la ioh sngew ia ka jingkren na baroh ar liang, na u ba kynnoh bad ba shah kynnoh u Lamphang ka iing dorbar u la buh ia kane ka phang ba ai ka iing dorbar kan rai la ia kane ka privilege motion, halor kane ka bynta ka iing dorbar kala kyntait ia ka Privilege motion da ka Voice Vote.
