Shillong, Lber 18: U Myntri Rangbah ka jylla u Conrad K Sangma haba jubab ia ka mat ia kren ban shimrai ban pynbeit ryntih ia ka jingspel dak ia ka ktien Khasi bad Garo ia kaba la wanrah da u bah George B Lyngdoh MLA kum ka jingpynkhlain shuh shuh ia ka jingdawa ban ioh ia ka jingithuh ia ka ktien khasi ha ka khyrngit kaba phra jong ka riti synshar jong ka Ri India, la ong ba ka sorkar kan sa peit lada don kam ban don ia ka committee ban peit halor kane ka mat.
Haba ia dei bad kane ka mat ia kren u myntri rangbah u la ong ba ka sorkar kala shim khia ban ioh ia ka jingithuh ia ka ktien khasi bad Garo ha ka khyrngit kaba phra jong ka riti synshar jong ka Ri India dei na kane ka daw ba ka iing dorbar ha ka 27 Naiwieng 2018 kala shim ia ka rai ban dawa na ka sorkar pdeng banioh ia ka jingithuh ia ka ktien khasi bad Garo hapoh ka khyrngit kaba phra jong ka riti synshar ka Ri India.
U Myntri rangbah u la ong ba kumba ka long mynta ka ktien khasi bad Garo kala dang kiew bad ia kane ka ktien la pule haduh ka kyrdan P.hd bad ka sorkar kala pynrung ha ka polisi ka tnad pule puthi ban pynkhlain ia ka jingpule ia ka ktien khasi bad Garo ha ki skul bad wat ha kaba thoh ia ka eksam MPSC.
Naduh bala ioh ia ka dak thoh ha ka ktien khasi naduh u snem 1842 bad ktien Garo ha u snem 1860, ka tnad pynneh pynsah ia ka riti dustur ruh kala juh pynmih shibun ki kot ha ka ktien khasi bad Garo, dei ha dien 46 snem ba la ioh ia ka jylla ka sorkar kala shim ia ka rai ban dawa ban ioh ia ka jingithuh ia ka ktien khasi hapoh ka khyrngit kaba phra jong ka riti synshar ka Ri India.
U Myntri Rangbah u la ong ba dei ha dien ba ka sorkar Meghalaya kala shim ia ka rai ka sorkar pdeng kala phah ia ka jignthoh ban ong ba ka sorkar pdeng ka sngewthuh ia ka jingangnud jong ki paidbah ban pynneh pynsah ia ka ktien, ka sorkar jylla kan dang iai bteng ban ia kren bad ka sorkar pdeng halor kane ka bynta.
Haba ia dei bad ka jingai jingmut ban don ia ka Kommittee ban peit ia kane, na ka liang jong u myntri rangbah u la ba ka sorkar kan peit lada don kam ia ka kommitte, halor ka Spel dak ktien Khasi bad Garo ka sorkar kala shim khia ia kane ka phang, ha dien ba la pynshai u myntri rangbah u la kyprad ban weng noh ia kane ka mat ia kren hapoh ka iing dorbar.
U George B Lyngdoh MLA, ha dien ba la ioh sngew ia ka jingjubab jong u myntri rangbah ka jylla ba ka sorkar kan sa shim khia lada don kam ban don ia ka Kommittee u ong ba don kam ban pynbeit ia ka jingspel dak ia ktien khasi bad Garo, bad ha dien ba la kren ban ioh ia ka jingpynshai la weng noh ia kane ka mat ia kren.
Kiwei ki MLA kiba la kyrshan ia kane ka mat ia kren ban shim ia ka rai ki long u bah Kimfa S Marbaniang, bah PT Sawkmie, bah Mayralborne Syiem, Kong Dr Ampareen Lyngdoh, u Zenith M Sangma kien baroh kila ban jur ba don kam ban pynbeit ia ka jingspel dak bad kila ai jingmut ba dei ban don ia ka committee ban eit ia kane ka kam.
