Shillong, Lber 20: Ki shipai jong ka Ri India kin rakhe ia ka jingdap 50 snem jong ka jingjop thma pyrshah ia ka ri Pakistan ha u snem 1971 ia kaba la tip kum ka thma pynlait lait luid ia ka Ri Bangladesh kaba mynta ia kane ka jingle burom yn tip kum ka ‘Swarnim Vijay Varsh’.
Ka kynhun shipai jong ka 101 Area kaba don ha Shillong kala pynkhreh ia kane ka jingrakhe kaba 10 bnai lynter ia kaba yn sdang da ka jingpyninam ia ki tiar siat kaba lai sngi lynter ha madan polo.
Ki shipai jong ka 101 Area ban rakhe ia kane ka jingsap 50 snem jong ka jingjop thma ka Ri India pyrshah ia ka Pakistan, kin pyni ia ka phlim ha kaba ia dei bad ka thma 1971 ha ki kolej bad ki skul ha ki lai tylli ki jaka, Shillong, Guwahati bad Jorhat ha u bnai Iaiong bad Jymmang ha Assam.
Ha u bnai Jymmang kan don ka jingpud jingtem ha kane ka nongbah Shillong, hau Nailar bad Nailur kin rah ia ka sharak jong ka jingjop na Guwahati sha Shillong bad ha u Nailar kin pynlong ia ka jingialehkai kynjat boll ha Jorhat, ka jingiaid lynti ha lynti iaid kjat jong u David Scott ha u Naiwieng.
Ka jingle burom kaba heh ha kaba ia dei bad kane ka jingjop thma pyrshah ia ka Pakistan kan long haGuwahati ha u Naiwieng bad ka jingniah saikil lang ha pdeng ki shipai India bad Bangladesh na Akhaura sha Kolkatta kan long ha u Naiwieng bad Nohprah.
Ka jingpynkut ia kane ka jingle burom kan long ha Shillong ha ka 16 tarik Nohprah 2021 da kaba pynkup burom ia kito kiba la don bynta ha kane ka tham 1971 bad yn pynkut da kaba buh syntiew ha u mot jong ki to kiba la len ia lade na ka bynta ka Ri ha Shillong.
Haka history jong ka thma jong ka pyrthei dei tang ha kane ka thma kaba ka jingpyndem jong ki shipai kiba bun tam eh ha dien ka thma bah ba Ar, ha kane ka thma India Pakistan 1971 ki shipai ka Pakistan kiba la wan ban pyndem ki long haduh 93,000 ngut.
