Shillong, Lber 22: U bah AL Hek haba buh ia u mawnongrim ban kyntiew ia ka Mylliem-Umthlong Dispensary sha ka Primary Health Centre ha mylliem mynta ka sngi u la kyntu ia ki paidbah ba kin long kiba leh khuid namar ka PHC ka dei ka jong u paidbah.
Haba kren ha kane ka jingialang kum u kongsan u myntri ka koit ka khiah u bah Hek, la ong ba ia kane ka jingtrei dei ban pyndep hapoh ka 18 bnai, ka jinglut ha kyntiew ia ka Dispensary sha ka PHC kan long T.7.92 klur tyngka.
U Myntri u la ong ba ka sorkar kala kham pynleit jingmut ban pynbiang ia ki lat ai jingsumar ia ki long kmie kiba armet , la kyntu ia ki long kime ba kin da phah sumar ia lade man ka por khnang ba kin kha suk ynda la dei ka por kha bad la ban jur ia ki paidbah ba kin pynrung kyrteng hapoh ka MHIS na ka bynta ka jingmyntoi.
Ha ka jingkren jong u bah Hamletson Dohling mytnri ba dei peit ia ki kam pynroi nongkyndong u ba dei ruh u MLA jong kane ka jaka u la ong ba kane ka dei ka jingangnud jong ki paidbah kaba la slem ia kaba la lah ban pynrulong mynta ka sngi, kum u MLA katei ka jaka u la kyntu ia ki paidbah ba kin ia trei lang bad ka sorkar ha kaba ia dei bad kane ka kam.
Kiwei kiba la kren ha kane ka jingialang buh mawnongrim ki long u Dr A War DHS(MI), Dr M R Basaiawmoit DHMO ka East Khasi Hills District bah P T Passah BDO Mylliem Block bad u Dr D P Syiem SMHO jong ka PHC Pomlum.
