Shillong, Lber 31: Ka JSU Jowai Circle ha ka jingialam u President u samla Aplang Lamare ryngkat bad ki dkhot ka seng ki lah leit ban hiar jurip ia ka Sub Center kaba don hapoh ka shnong Chyrmang.
Ha ka jingleit jurip ka seng ka lah lap ba kane ka sub center kalah kylla ing jah bad ki jingkhang ìit bad ka gate ,ki jingker nar ki lah sarang lut bad ka kompon jong kane ka jaka ka lah mih ñuit mih ñier bad ki jingkhang ìit ki lah pait katto katne tylli.
Ka seng lah kynduh ruh ia u DMHO ka West Jaintia Hills District bad ki lah ai da ka jingthoh sha u ban jubab ba balei lah pynslem ban plie iakane ka sub center kaba lah dep shna iaka naduh u snem 2014 ba lah pynshna da ka National Health Mission.
Na ka liang DMHO u lah pynpaw ba kane ka jaka kam don nong ap satia bad na ka liang ka seng ka lah dawa mardor badei ban plie noh iakane jaka sumar nongpang namar ki paidbah kiba sah hakane ka shnong ki shem jingeh shisha.
