Shillong, Iaiong 19: Mynta ka sngi u Chief Executive Member jong ka KHADC u bah Titosstarwell Chyne u la leit ban jurip da lade ia ka jingtrei khnang ba hapoh mynta u snem un ioh ban plie noh ia kane ka jaka ai jinghikai bad sumar khasi tynrai.
Ha ba kren ha ki lat pathai khubor ha dien ka jingjurip la ong ba ha dien ba ia ki jingtei ia ki iing la dep ban shna, hynrei ki dang don ki jingtrei kiba katto katne ki dang sah kum ki kynroh, ka surok, ka um bad ka light.
U CEM jong ka KHADC u la ong ba ka jingleit jong u sha kane ka jaka ban peit da lade ka long ban buh noh ia ka thong ban ioh ban plie noh ia kane ka jaka ai jinghikai bad sumar dawai khasi ha kane ka jaka ba don la Lum Sohpet Bneng.
La iathuh ba ka jingtei ia kane ka jaka haduh mynta kala kot kumba hynniew klur bad la antad ba haduh ban da dep pura ban shna ia kane ka jaka kan poi sha ka khyndai klur ei ei la iathuh u CEM ka KHADC.
Ka jingtei ia kane ka jaka ka long ban iarap ia ki briew kiba ai dawai khasi, kane ka jaka kan long ruh ka jaka ai jingsumar bad ha ka juh ka por kan long ruh ka jaka ai jinghikai na ka bynta kito kiba kwah ban ai ban ai dawai khasi.
Namar kumba ka long mynta kane ka jingai dawai khasi ka duh noh ha dien ba u ne ka briew ki khlad noh, dei halor kane ka nongrim ban pynneh pynsah ia ka jingai dawai Khasi ka KHADC kala tei ia kane ka jaka ha kaba ki don ki kamra klas ban ai jinghikai ia ki samla.
La iathuh ba ha kane ka jaka na ka liang jong ka District Council kan thung ia ki dawai kynbat ban pynneh pynsah ia ki kynbat da ka jingiatreilang bad ki nongsumar ba ai dawai khasi kane ka long ban pynneh pynsah ia ki kynbat ki skut.
U CEM jong ka KHADC u la ong ba ha kane ka jaka kan don ruh ka jaka ban peit bniah ia ka jingtyllait ia ki dawai khasi bad ka thong ka long ban pynneh pynsah ia kane ka jingsumar tynrai ia kaba ka juh tip kum ka jingsumar dawai khasi.
Ha kane ka sngi la don lang ki ophisar na ka ophis jong ka KHADC ki dkhot jong ki nongai dawai khasi kiba la leit ban jurip lang ban peit hato ka tei ka jaka kala bit la biang ne em ban ioh ban plie noh ia kane ka jaka sumar bad ai jinghikai ha ka jingsumar dawai khasi.
