New Delhi, Iaiong 20: Ha ka jingialang ba la pyniaid da u Myntri Rangbah Duh ka ri u Narendra Modi, la shim ia ka rai ban shah ia baroh ki briew kiba la kot 18 snem ka rta ba kin ioh dawai Covid naduh ka 1 tarik u Jymmang.
U Myntri Rangbah u la ong ba ka Sorkar ka la trei shitom la palat shi snem mynta ban pynthikna ba ki briew ka ri kin lah ban ioh kham stet ia u dawai Covid. U la ong ruh ba ka ri mynta ka dei kaba stet tam ban ai dawai Covid ba yn dang bteng ia kane ka jingpynstet ha ka jingai dawai.
Ia ka National Covid-19 Vaccination Strategy jong ka ri la saindur ha ka rukom kaba ryntih bad kaba peit lut ia baroh, kaba dang pynkhlain ia ka jingwad bniah bad ki bor synshar naduh u Iaiong 2020. Katba ka dang pyrshang ban pynkhlain bad pynstet ia ka jingai dawai, ka la buh nongrim ruh ha ka jingdonkam ia ka jingryntih ban lah ban pyndep ia ka jingai dawai kaba iar tam ha ka pyrthei.
Ka rukom treikam ka India ha kane ka don nongrim ha ka jingstad science bad la ialam lynti da ki Global Best Practices ne ki rukom kiba biang tam ha baroh ka pyrthei, ki SoP jong ka WHO bad ki riewshemphang kiba don bynta ha ka National Expert Group on Vaccine Administration for Covid-19 (NEGVAC).
Ka India ka la bud ia ka rukom treikam katkum ka jingdon ki dawai bad ka jingpeit shuwa ia kito kiba kham don ha ka jingma haba ka la shim ia ki rai iano yn ai dawai shuwa. La kyrmen ba yn pyndep shibun ki jingai dawai ia kito kiba kham don ha ka jingma shuwa ka 30 tarik u Iaiong.
Ia ka bynta kaba nyngkong jong ka National Covid-19 Vaccination Strategy la sdang ha ka 16 tarik u Kyllalyngkot 2021 da kaba peit bniah shuwa ia ka jingiada jong ki nongiada jong ngi, kito kiba trei ha ki kam ai jingsumar bad kito kiba trei ha ki kam kiba iadei bad ka Covid-19.
Katba dang kham iaid ryntih ki kam, la sdang ia ka bynta kaba ar naduh ka 1 tarik u Lber 2021 da kaba peit bniah ia kito kiba don ha ka jingma kaba kham khraw kum ki briew kiba la palat 45 snem ka rta haba la iohi ba kine ki don ka byna kaba 80% ha ka jingiap briew ha kylleng ka ri. La kynthup lang ruh ia ki kam shimet ba kin kham pynkhlain ia kane ka kam.
Katkum ki jingbthah jong u Myntri Rangbah duh, ka Sorkar India ka la iakren bad iatrei lang bad kito kiba don bynta bad kine ki kam naduh ki jaka wad bniah haduh ki nongshna dawai hapoh ri bad kito kiba don shabar ri bad ki bor kiba dei ban ai jingbit.
La pynkhlain ia ki jaka shna dawai ba pyniaid da ki kynhun shimet ha ka ri kiba shna dawai bad ia kane la leh lyngba ki rai kiba kyrpang naduh ka jingplie lad ban don ka jingiatreilang, ki jingpyrshang bad ki jingshna ia ki mar.
Katkum ki jingbthah jong u Myntri Rangbah duh, ka Sorkar India ka bteng ia ka jingiakren bad ka jingiadei bad ki nongshna dawai, bad kane ka kynthup ia ka jingphah ia ki Myntri sha ki jaka treikam jong kine ki nongshna dawai khnang ban sngewthuh ia ki jingdonkam bad ban pynbiang ia kine ki jingdonkam kum ki grant, ki jingai pisa lypa, ki jingplie shuh shuh ia ki jaka shna dawai khnang ban lah ban pynmih dawai shuh shuh.
Kane ka la ialam sha ka jingioh jingbit ar tylli ki jaka shna dawai, kata ka Serum Institute of India bad Bharat Biotech, bad ka Sputnik ka ban sa sdang shna dawai shen ha India.
Ka Sorkar ka la pyndonkam ruh ia ki kam shimet ha ka jingai dawai naduh ba la sdang ia kane ka kam. Mynta haba la iaid ryntih ki kam ka la wan ka jingsngew shngain ha ki kam jong ka sorkar bad ki kam shimet ba kin pynkhlain bad pyniar ia ki kam jong ki.
Ha ka bynta kaba lai, ka thong jong ka National Vaccine Strategy ka dei ban pynioh dawai ia baroh. Kane kan kyrshan ia ka jingpynmih dawai bad ka jingpynbiang ia ki dawai da kaba ai jingmyntoi ia ki nongshna dawai lada ki pynkhlain bad pyniar shuh shuh ia ki kam jong ki ban kan khring ruh ia kiwei kiwei ki nongshna dawai kiba napoh ri bad kiba nabar ri.
Kane kan wanrah ia ka jinglaitluid ha ka dor, ka jingthied ia ki dawai bad ka jingioh bad jingpyniaid ia ki dawai ka ban plié lad ia baroh kito kiba don bynta ha kane ka kam ba kin trei katkum ki jingdonkam ha ki jaka bapher bapher.
Ki mat ba kongsan jong ka bynta ba lai jong ka National Covid-19 Vaccination prokram ka ban sdang naduh ka 1 tarik u Jymmang, 2021 ki long:-
Ki nongshna dawai kin pynbiang 50% jong ki dawai ba ki pynmih man u bnai na ki Central Drugs Laboratory (CDL) jong ki ban ai sha ka Sorkar Pdeng bad kin ioh lad ban ai ia kaba sah sha ki Sorkar Jylla bad sha ki iew (Ia kane yn ong ‘kiwei ki lad’ lait na ka lad Sorkar India).
Ki nongshna dawai kin pynbna lypa ia ka dor ban pynbiang 50% ban poi sha ki Sorkar Jylla bad ki iew shuwa ka 1 tarik u Jymmang, 2021. Da kaba peit ia kane ka dor, ki Sorkar Jylla, ki hospital shimet, ki karkhana bad kiwei kiwei kin ioh ban thied dawai na ki nongshna dawai.
Ki hospital shimet kin hap ban thied dawai COVID-19 na kane ka 50% ba la mang na ka bynta kiwei ki lad lait na ka lad Sorkar India. Ki nongpynbiang dawai COVID kin hap ban pynbna ia ka dor jong ki dawai COVID. Kito kiba la palat 18 snem ka rta kin ioh dawai lyngba kane ka lad.
Ka jingai dawai kan iaid katkum ka rukom treikam ha ki jaka ai dawai jong ka Sorkar India ha kaba yn ai dawai ei ia kito kiba dei ban ioh ia kane ia kaba la pynbna lypa kum ki nongai jingsumar, kito kiba trei ha ki kam COVID-19 bad kito kiba la palat 45 snem ka rta.
Baroh ka jingai dawai (lyngba ka Sorkar India bad kiwei ki lad kiba lait na ka lad Sorkar India) kin dei shi bynta jong ka National Vaccination Programme, bad dei ban bud ia ki kyndon kum ka jingiaid lyngba ka rynsan CoWIN, ka jingpyniasoh bad ka AEFI bad kiwei kiwei ki kyndon. Ia ka jingdon bad ka dor jong ki dawai ha baroh ki jaka ai dawai hap ban pyntip mardor.
Ka jingiapher hapdeng ka jingai dawai kaba long 50% lyngba ka lad Sorkar India bad 50% lyngba kiwei kiwei ki lad kan treikam ia baroh ki dawai kiba pynmih hapoh ka ri. Hynrei ka Sorkar India kan shah ia ka jingpyndonkam ia ki dawai kiba wanrah nabar ri tang lyngba ka lad kiba lait na ka lad Sorkar India.
Ka Sorkar India, na ka bynta jong ka, kan pynbiang dawai sha baroh ki Jylla bad ki UT katkum ka jingbun ki case bad ka jinglah pyndep ia ka jingai dawai. Ka jingpynlehnohei ia ki dawai ruh yn khein ha kane bad kane kan ktah ia ka jingioh dawai. Da kaba buh nongrim halor kine ki mat, yn sa rai halor ka jingioh dawai jong man ki jylla bad yn sa pyntip lypa ia ki jylla halor kane.
Ka bynta ba ar jong ka jingioh dawai jong baroh kito kiba don jingma kum ki nongai jingsumar, ki nongtrei ha ki kam COVID-19 bad ki briew kiba la palat 45 snem ka rta kan long kaba kongsan, bad na ka bynta kane yn sa ai jingtip shaphang ka rukom treikam.
Kane ka polisi kan treikam naduh ka 1 tarik u Jymmang 2021 ban yn dang peit bniah ia ka na ka por sha ka por.
