Shillong, Iaiong 27: Ka Environment Cell jong ka Khasi Students’ Union ka pynpaw iaka jingsngew bynniaw bad sngewbitar halor ka jingklun jaka jongka 67 Battalion jong ki Pulit CRPF bad ka Shillong Municipal Board kaba la pynrit iaka lynti iaid jong ka Wah Umkhrah kaba dei kawei naka wah ba kham heh bad kham kongsan kaba don ha Nongbah Shillong.
Ka Seng ka pynpaw iaka jingsngew lyngngoh kaba jur halor kane ka jingleh donbor kine ki tnad sorkar da kaba iaid lait ruh iaki bor shnong bad iaki kyndon ain kumno ban iada naka jingpynjulor ia ka wah kaba lah ban ktah pat hadien habud ia kiba bunbalang.
Ka jingklun jaka jong ki CRPF bad ka Shillong Municipal Board naka liang jong ka Seng ngi sngew ba ka dei ka kam beain bad ngi kyntu iaki bor District jong ka East Khasi Hills ba ki dei ban tuklar mardor bad ba ki dei ban leit khang ban nym shah ban tei iaka Super Market haki bynta jong kane ka Wah.
Ka Seng ka sngew ruh ba ka jingklun jaka bad theh khyndew jongki CRPF ym tang ba ka pynrit iaka lynti iaid jongka wah ne ka buh jingma iaki ing ki sem ba don harud wah haka por slap hynrei ka pynjakhlia ia kane ka Wah bad ka pynduh pyndam ruh ia kane ka Wah.
Kane ka jingleh jong ki Pulit CRPF bad ka Shillong Municipal Board ngi sngew ba ki la pynkhein ruh iaki kyndon ain jongka Meghalaya Water Act, 2011 kaba khang pyrshah ban leh ia kino ki kam (activities) kiba lah ban pynsniew shuh shuh iaka wah.
Na ka liang ka Shillong Municipal Board bad ka CRPF wat lada thmu ban iada iaka jingshlei um na kane ka Wah haka por Lyiur la dei ban leh daka jingiamir jingmut lang bad ki bor shnong khlem da khtah ne pynwit pat iaka lynti iaid jong kane ka Wah.
Naka liang jong ka Environment Cell ka kyntu iaka bor District bad ki tnad sorkar ban shimkhia mardor halor kane bad ngi dawa ruh iaka State Water Advisory Board bad ka State Pollution Control Board ba ka dei ban tuklar mardor halor kane ka jingklun jaka ban pynjot iaka wah daki pulit CRPF bad ka Shillong Municipal Board.
Ka Seng ka kyrshan ruh iaka jingpyrshah jong ka Dorbar Shnong Lawmali halor kane ka bynta bad Shen na ka liang ka Seng kan sa shong ia pyrkhat da kano ka lynti ban leh lada ki pulit CRPF bad ka Shillong Municipal Board kim kynran dien naka jingpyrshang skud jaka bad pynjot pynsniew ia kane ka wah.
