Shillong, Jymmang 12: U bah Gigur Myrthong MLA bad MDC jong ka Mawthungkut Konstitwensi, u la ong ba un nym lah ban tip lut ia ki jingjia hapoh konstitwensi lada ym don ba pyntip, lada don kamno kano ka jingdon kam dei ban pyntip ym ban shu ia kynthoh.
Haba kren ha u SP News Agency, u bah Gigur u la ong ba kaei kaba la jia hapoh konstitwensi ha kine ki sngi khlem don ba pyntip sha u kum u MLA bad u ba dei ruh u MDC jong katei ka jaka hynrei la shu kynnoh hapoh Social Media.
La ong ba kum u nongmih khmat na katei ka thain u la leit sha Nongstoin Hospital ban wat jingtip ia ka jingdon kiba shitom na katei ka konsititwensi jong ki jong u kiba dei ki ASHA bad ha dien ba la ioh jingtip la thied ia ki jingiarap ban pynpoi sha kiba don kam.
U bah Gigur u la ong ba kam dei kaba suk ban shutip lut ia baroh ki jingjia hapoh ka konstitwensi lada ki paidbah kin pyntip sha u kum u MLA bad MDC, la ong ba lada ka don kano kano ka jingjia ki dei ban pyntip ban lah ban iarap ia kaba la lah ban iarap, namar ka Mawthyngkut Konstitwensi ka don haduh 328 tylli ki shnong.
Kat ka jingbun ki shnong kan long kaba eh ban tip kano ka long iing kaba don kam ia ka jingiarap lada ym don ba pyntip, kane ka jingiakhun pyrshah ia kane ka khlam COVID-19 kumta la don kam ban ia trei lang ban da kaba pyntip lada ka don kano kano ka jingdon kam.
Ha dien bala ioh ia ka jingtip na ka liang jong u MLA u la lah ban pyntpoi ia ki jingiarap sha ki long iing ba ioh ia kane ka jingpang COVID-19 hapoh ka shnong Nongprut.
