Shillong, Jymmang 25: Ka seng UHM kala thoh sha ki Deputy Commissioner jong ki hynnriew tylli ki District, East Khasi Hills,Ri Bhoi,West Khasi Hills,South West Khasi Hills, East Jaintia Hills,West Jaintia Hills District ban kyntu ia ki ba kin ia kren lem bad ki bor ba halor ban iarap ia ki long iing kiba duk ha kane ka por jong ka jingkhangdam na ka daw jong kane ka khlam COVID-19.
Haba ia dei bad kane kum ka seng kam lah ban shu sngap dei halor kane kaba ka kyntu lyngba jong ki Deputy Commissioner ba kin shim khia ban iarap ia ki marbam mardih lane da ka pisa ruh kum juh lada don ka lat namar ki don bun bah ki long iing ki bym don ia ka kard ration.
Ha ka juh ka por ka seng ka kwah ban ioh jintip ba balei ka sorkar kam lah ban khot ia ka jingialang jong ki khlieh nongsynshar shnong bad la shu pynlong ia ki tang kum ki nongput turoi ha kane ka jingialeh pyrshah ia kane ka khlam.
Ka UHM kala kam ba ha u snem 2020 ka dang don ka jingiatrei lang bad ki nongkit kam shnong hynrei mynta kam don shuh la kynnoh katei ka seng, la kyntu ruh ia ka sorkar ba ka dang dei shuh ban pynshai paidbah halor u Dawai namar bun ki dang don ha ka Umdum.
Ka seng UHM ka pynpaw ruh ia ka jingsngewsih ia ka jingkren jong u symbut Myntri Rangbah ka jylla, la kyntu haba kren dei ban da thew da pyrkhat ba kan nym ktah iano kano, bah Charlie J. Rani President bad u bah Banshai Marbaniang Joint Secretary ka seng ha ka kyrwoh kaba la phah ia kaba la soi da ki nongialang ka seng.
