Shillong, Jymmang 25: Mano ban kitkhlieh ba shah bat ki kali kit jhur ba wan na Bhoi ha ki pulit ha Mawiongrim, mynta ka sngi byn tylli ki kali kiba la thep jhur ban wan die sha Shillong kila shah bat ha katei ka jaka.
Haba u SP news Agency u la kylli na ki pulit kiba don ha katei ka jaka ha Mawiongrim kila iathuh ba kane ka jingbat jong ki ia ki kali kit jhur ha katei ka jaka ka long halor ka jingbthah kaba la wan na ka ophis jong ka Deputy Commissioner jong ka East Khasi Hills District.
U Myntri ba dei peit ia ka tnad rep u bah Banteidor Lyngdoh haba kren ha u SP New Agency u la ong ba ha ka jingshisha kila dep ban ia kren hapoh jong ka sorkar ba ia ki kali kit marrep dei ban pynlait la ki wan na kano kano ka jaka kiba dei na Meghalaya.
U myntri u la ong ba ha dien ba la ioh jingtip la ia kren bad ki bor jong ka District bad la pynlait ia kine ki kali kit jhur kiba wan na Bhoi, u myntri u la pynpaw ia ka jingsngewsih ba kan jia kumne, la ong ruh ba ha ka jingshisha ia ki kali kit marrep la ki wan kano kano ka bynta jong ka jylla Meghalaya dei ban shah.
U bah George B Lyngdoh MLA ka Umroi u la ong ba ka long kaei kaei kaba ym lah ban pdiang ia ka jingpynbna ka DC jong ka East Khasi Hills shiteng meit ban ong ban nym shah ia ki kali ki jhur na Bhoi, ki nongrep dang step kila leit kheit ia ki jhur bad kila dep ban thep ha ki kali ban wan kit ban die, kin tip shaei ia kata ka jingpynbna shiteng syniang.
Na ka liang jong u MLA ka Umroi u la ong ba ka sorkar ka dei ban da peit haba pynmih ia ki jingpynbna, ym ban shu pynbna khlem da pyrkhat ia ki nongrep, kane ka jingleh ka long kaba ym lah ban pdiang. Halor kane u la kren ruh ia ka DC jong ka Ri Bhoi ban peit ba ki nongrem kim dei ban kynduh jingeh.
