New Delhi, Jymmang 29: U Myntri Rangbah Duh ka ri, u Narendra Modi mynta ka sngi u la pynlong ia ka jingialang kaba kongsan bha ban iakren halor ki sienjam ba ka Sorkar kan shim ban ai jingkyrshan ia ki khynnah kiba la kylla khun swet namar ka khlam Covid-19.
U MR u la pynbna katto katne ki jingiarap ia ki khynnah kiba la shah ktah ha kane ka khlam COVID. Ha ka por ba u dang pynbna ia kine ki jingiarap, u MR u la ban jur ba ki khynnah ki dei ka lawei jong ka ri bad ba ka ri kan leh katba lah ban kyrshan ia ki bad ban iada ia ki khnang ba kin long ki rishot jong ka lawei kaba bha jong ka ri.
U MR u la ong ba ha kine ki por jong ka jingeh, ka dei ka kamram jong ka imlang sahlang ban sumar ia ki khynnah bad ban ai mynsiem ia ki na ka bynta ka lawei kaba bha. Kino kino ki khynnah kiba la kylla khun swet lane kiba la duh ia u nongpynbit pynbiang namar ka khlam Covid 19 kin ioh jingkyrshan hapoh ka skhim ‘PM-CARES for Children’.
U la ong ruh ba kine ki sienjam ba u la pynbna ki la urlong namar ka jingnoh synniang ki briew sha ka PM CARES Fund ka ban ai jingkyrshan ia ka India ha ka jingialeh pyrshah ka khlam COVID-19.
Ka Fixed Deposit ha ka kyrteng jong ki khynnah: Ka PM CARES kan noh synniang lyngba ka skhim ba kyrpang ban wanrah ia ka corpus kaba kot sha ka T 10 lak na ka bynta man u khynnah haba u kot 18 snem ka rta:
Kane ka corpus: Yn pyndonkam ban ai bai bam naduh 18 snem ka rta haduh 5 snem na ka bynta ki jingdonkam jong kine ki khynnah ha ka por ba ki dang don hapoh ka jingpule bad Haba ki dap 23 sem, kine ki khynnah kin ioh ia kane ka corpus shisien ioh bad ki lah ban pyndonkam hi ia kane.
Ka jingleit skul: Ia ki khynnah kiba hapoh 10 snem, Ki khynnah kin ioh rung skul ha ki Kendriya Vidyalaya ne ki skul shimet ba jan tam. Lada ki ioh ban leit sha ki skul shimet, ia ka jingsiew bai skul katkum ka RTE yn siew da ka PM CARES.
Ka PM-CARES kan siew ruh na ka bynta ki jain skul bad ki kot, Ka jingleit skul: Ia ki khynnah hapdeng ka rta 11-18 snem, Yn pynrung skul ia ki khynnah ha kano kano ka residential school jong ka sorkar pdeng kum ka Sainik School, Navodaya Vidyalaya bad kiwei kiwei.
Lada jia ba khynnah ki khynnah ki bteng ban don hapoh ka jingpeit jingsumar jong kiba haiing hasem, ki mei-ieid pa-ieid, kumta yn pynrung skul ia u ne ka ha ka skul Kendriya Vidyalaya lane skul shimet ba jan tam.
Lada pynrung skul ia ki khynnah ha ka skul shimet, ia ki bai skul yn siew na ka PM CARES katkum ki kyndon jong ka RTE. PM CARES kan siew ruh na ka bynta ki jain skul bad ki kot. Ka jingkyrshan na ka bynta ka jingpule Higher Education.
Yn ai jingiarap ia ki khynnah ban ioh shim ram na ka bynta ka jingpule (education loan) pyntbit lane ki jingpule higher education ha India katkum ki kyndon ba la don lypa jong ka Education Loan. Ka sut na ka bynta kane ka ram yn siew da ka PM CARES.
Kum kawei pat ka lad, yn ai scholarship kaba iaryngkat bad ki tution fee, course fee na ka bynta ki jingpule undergraduate, vocational course katkum ki kyndon jong ka sorkar na ka bynta kine ki khynnah hapoh ki skhim jong ka sorkar pdeng lane sorkar jylla. Na ka bynta ki khynnah ki bym ioh ia kine ki skhim scholarship ba la don lypa, ka PM CARES kan pynbiang ia ka scholarhip.
Ka Health Insurance, Yn pynrung kyrteng ia baroh ki khynnah kum ki nongioh jingmyntoi hapoh ka skhim Ayushman Bharat (PM-JAY) kaba don ka insurance kaba T. 5 lak. Ia ka jingsiew premium na ka bynta kine ki khynnah haduh ka rta 18 snem yn siew da ka PM CARES.
