New Delhi, Jylliew 5: Ka Convergence Energy Services Limited (CESL), jong Energy Efficiency Services Limited (EESL) hapoh ka Tnat Bording ka la soi ar tylli ki soskular (MoU) bad ka jylla Meghalaya bad ka Union Territory Ladakh na ka bynta ka jingpynmih bording solar kaba kot sha kumba 65 MW.
Ha ka MoU kaba nyngkong ba la soi bad ka Meghalaya Power Distribution Corporation Limited (MePDCL), ka CESL ka la soi ia ka soskular na ka bynta kumba 60 MW, ka ban kynthup ruh ia ka jingwad ia ki jingiadei bad ka jingkyntiew ia ka khaii bad ka jingpyntreikam ia ki pump.
Ki light LED bad ki solar power station na ka bynta ki kam rep bad kiwei kiwei ki kam ha ka Jylla Meghalaya. Bad ka Union Territory Ladakh, ka CESL kan pyntreikam ia ki prokram pynmih bording ba khuid kaba kynthup ia ka jingpynmih bording solar kaba 5 MW ha ka thain Zanskar.
Haba kren shaphang kine ki jingiatreilang, ka Mahua Acharya, CEO & MD, CESL ka la ong ba ka CESL ka sngewnguh ban ioh ban iatrei lang bad ki bor Sorkar jylla na ka bynta ka jingpynmih bording kaba khuid. Ka jingpynmih bording na ki projek ba rit ka iarap bha namar ka pynduna ia ka jinglut jingsep jong ki DISCOM, ka kyntiew ia ka jingbiang bad jingbha jong ka bording bad ka plié lad na ka bynta ka mariang kaba khuid lyngba ka jingpynbiang ia ki mar elektrik kiba bha sha ki briew.
Ha kaba kren shaphang ki jingiatreilang, u R K Mathur, Lieutenant Governor ka Ladakh u la ong ba ka jingioh ia ka bording ha Ladakh ka long kaba donkam bha. U la ong ruh ba ka Sorkar Ladakh ka pyrshang ban kyntiew ia ka rukom im jong ki briew ha Ladakh da kaba pynioh ia ka bording ba lah ban pynthymmai biang, ki lad kiba pynduna ia ka jingdonkam bording kiba lah ban pyntreikam ha ki jaka ba eh ban poi jong ka Ladakh.
U Arunkumar Kembhavi, Chairman-cum-Managing Director, Meghalaya Power Distribution Corporation Limited, Sorkar Meghalaya u la ong ba kane ka MoU bad ka CESL kan plié lad ia ka Meghalaya ba kan long kaba dap ba biang ha ka bording. Kane ka kam kan plié lad ban tyngkai ia ka bording, pynduna ia ka jingduhnong bad kan kyntiew ia ka jinglah pynmih bording solar jong ka ri.
Ia kine ki MoU la soi ha ka World Environment Day, ban pynioh ia ka bording kaba khuid, kaba biang dor bad kaba lah ban shaniah sha ki jylla. Ka dei ka sienjam kaba heh na ka bynta ka jingkyntiew ia ka kyrdan jong ka India kum kawei na ki nongialam ha ki kam pynmih bor ding kaba khuid bad ban kyntiew ia ka jinglah jong ka ri ban pynmih bording ba khuid.
