Shillong, Jylliew 19: Ka jingialang jong ka Congress Legislature Party kaba la long mynta ka sngi kala dawa na ka sorkar ba ka dei ban tehlakam ia ka jingkiewdor ki marbam mardih ha kane ka jylla Meghalaya.
U Nongialam ka CLP u Dr Mukul Sangma haba kren ha ki lat pathai khubor u la ong ba ka sorkar ka dei ban shim khia ia kaei kaba ki kren mynta ka sngi, ka jingkiew dor jong ki marbam ka long la palat pud, ka umphiang shi litter kaba shong dor T.100/- tyngka mynta kala kiew palat ia katei ka dor, kane ka long ia kiwei kiwei ki mar ruh kum juh.
U Dr Mukul u la kren bynniaw ba ki marba hiar dor ha iew ka long tang ki marrep kiba pynmih na kane ka jylla, ki marrep baroh ki hiardor, u la ai nuksa ba ka dor jong u shynrai im ha u bnai Iaiong ha ki nongkyndong ka dor ka long tang T.10/- shikilo.
Ha kane ka jingialang jong ka CLP kila ia kren ruh ia ka jingbym shimkhia kane ka sorkar ha kaba ia dei bad ka kam pud kam sam, ha kine ki lai snem kane ka sorkar mynta kam shym leh ei ei ban ia pynbeit.
La kynnoh ba kane ka sorkar kaba mynta kala leh donbor ha kaba kam sngap shuh iano iano ruh wat ia ki party kiba ia don lang ha ka sorkar ruh, u la ong ba kane ka paw na ka shithi kaba ka party UDP kala thoh sha u myntri rangbah ka jylla halor ka MeECL.
U nongialam ka CLP u la ong ba ka jingpyrshang ba kane ka sorkar ba kan ia pynbeit bad kito ki trai petrol pump kiba khlem siew ia ka khajna mynta lai snem da ka jingiapynbeit kaba shisien ka long kaba beain,
La ong ba ki petrol pump kila dep ban shim ia ka khajna na ki paidbah ha ka por ba theh petrol bad lada kim thep ia ka khajana sha ka sorkar ka long beain bad kata ka jingong ba ia pynbeit ka long kaba yn nym lahb an pdiang namar kane ka dei ka pisa kaba la lum na ki paidbah, la ong u Dr Mukul.
