New Delhi, Naitung 02: Katkum ki jingai jingmut jong ka National Technical Advisory Group on Immunization (NTAGI), ka tnat ka koit ka khiah jong ka Sorkar pdeng mynta ka sngi ka la mynjur ia ka jingai tika ia ki longkmie ba dang pun pyrshah ia ka COVID-19.
Kane ka rai ka la pynkup bor ia ki longkmie ba dang pun ba kin ioh ka jingsngewthuh kaba shai halor ka jingleit ai tika. Ia kane ka rai la pyntip sha baroh ki Jylla/UT khnang ba kin pyntreikam ia ka hapoh ka prokram ai tika jong ka ri kaba dang iaid mynta.
Ka prokram ai tika COVID ha ka ri ka kynthup ia ki jingai jingmut jong ki riewshemphang ba pawkhmat ha ka liang ka jingai tika, ka koit ka khiah jong ki paidbah, ka jingtehlakam ia ka jingpang bad ka IT.
Halor ki jingpynthikna katkum ka jingstad science bad epidemiology, ka prokram ka phaikhmat kyrpang sha ka jingpynkhlain ia ka rukom ai jingsumar ha ka ri da kaba iada ia ki nongai jingsumar bad ki briew kiba trei ha ki kam ialeh pyrshah ia ka COVID kumjuh ruh kiba iada ia ki briew kiba kham don ha ka jingma ban ioh ia ka jingpang.
Haduh mynta, baroh ki briew lait noh ki longkmie kiba dang pun ki dei ban ioh ia ka tika COVID. Mynta, la pyniar ia kane sha ki longkmie kiba dang pun ruh ha kane ka prokram ai tika kaba heh tam ha pyrthei.
Ki jingwad bniah ki la pyni ba ka jingioh COVID-19 ha ka por ba dang pun ka lah ban ktah bha ia ka koit ka khiah jong ki longkmie bad kin don ha ka jingma ban ioh ia ka jingshitom jur kaba lah ban ktah ruh ia i khunlung ha kpoh.
Ia kane ka bynta la peit bniah da ki riewshemphang katkum ka jingpynthikna ba ong ba ki longkmie ba dang pun ki don ha ka jingma ban kham shitom jur na ka COVID-19 haba ianujor bad ki longkmie ki bym pun lada jia ba ki ioh ia ka jingpang.
Shuh shuh, ki longkmie ba dang pun kiba ioh ia ka COVID-19 ki don ha ka jingma ha kaba ki lah ban kha ia i khunlung bym pat dap bnai bad kiwei kiwei ki jingktah kum ka jingkhlad ki khyllung hadien ba la dep kha. Ki riewshemphang ki la kren ruh shaphang ka jingdon lypa kiwei ki jingshitom, kaba lah ban kyntiew ia ka jingma ban ioh ia ka jingpang COVID-19.
Ka National Technical Advisory Group on Immunization (NTAGI) ka la ai jingmut ban ai tika ia ki longkmie ba dang pun. Ka National Expert Group on Vaccine Administration for COVID-19 (NEGVAC) ruh ka la ai jingmut lang ia kane.
Kumta, ka Tnat ka koit ka khiah jong ka Sorkar pdeng ka la pynlong ia ka jingtwad jingmut halor ka jingai tika COVID ha kylleng ka ri ban ioh ka jingsngewthuh kaba shai halor ka jingai tika ia ki longkmie ba dang pun.
