Shillong, Naitung 22: “Nga la lap ia ka jingshisha ba ka surok na Mawphlang sha Mawkyrwat kaba poi sha Ranikor kam dei ka National Highway, kane kala shai kdar na ka jingiakren bad u secretary ka Ministry Transport bad National higway jong ka sorkar pdeng ha Delhi”, la ong u bah Renikton L Tongkhar myntri ba dei peit ia ka tnad sam um ka jylla.
Haba kren ha ki lat pathai khubor mynta ka sngi, u myntri ka tnad sam um jong ka sorkar Meghalaya ba dei ruh u MLA jong ka Mawkyrwat, la ong ba ki paidbah ka thain ki la kyrmen ba kane ka surok na Mawphlang sha Mawkyrwat bad ban poi sha Ranikor ki dang mut ba kala dei ka National Highway.
Na ka liang jong u myntri ka tnad sam um u la pynshai ba ha dien ka jingiakynduh bad u Secretary ka tnad shna surok ka sorkar pdeng la pynshai ba kila don haduh 6000 tylli ki DPR kiba ka sorkar pdeng kala phah pynsangeh namar kim hap hapoh jong ka National Highway bad katei ka surok ka hap lang ha kane ka juh ka thup.
U bah Renikton u la pynshai ba ki paidbah kim dei ban shah ialalam bakla ha kaba ia dei bad kane ka surok kaba don kumba 100 km na Mawphlang kam dei ka National highway kumba kila pyrkhat baroh shikatta.
Kane ka surok ka iaid lyngba ki saw tylli ki MLA Konstitwensi, ka Mawphlang, Mawsynram, Mawyrwat bad Ranikor, kane ka surok ka long kaba don kam haduh katta katta bad ia kane u la pynsngew ia ka jingdon kam ki paidbah ka thain ha u Secretary ka tnad shna surok ka sorkar pdeng.
Haba ia dei bad kane ka surok u la ong ba kum u nongmihkhmat na katei ka thain un ia kren bad u myntri rangbah ka jylla ban wat ia ki lat ki lynti ban pynbha ia kane ka surok la ka dei na CRF lane na ka World Bank, ka long kba lyngngoh ba ia ka national highway la sdang tei na Baghmara haduh Ranikor katba ia kane ka bynta kaba don kam la iehnoh, la ong u bah Renikton.
