Shillong, Naitung 31: U Executive Member jong ka KHADC ba dei peit ia ki kam elaka u bah Jambor War u la ong ba ia ka kaiphot halor ka jingjia ha shnong Iongkhukli ba wan leh donbor ki pulit Assam ban pynsangeh ia ka jingthung ia ki ding ilektrik yn sa phah ia ka kaiphot ha kane ka taiew ban wan ha u Chief Executive member.
U Bah Jambor haba kren ha u SP News Agency u la iathuh ba ha ka sngi Thohdieng u la wan ban jurip ia katei ka jaka bad ha ka jingsngew thuh ka jong u na ka jingiakren bad ki rangbah shnong katei ka thain kane ka shnong Iongkhuli ka hap hapoh jong ka jylla Meghalaya ba dei hapoh ka Hima Mylliem.
Haba ia dei bad kane ka jingjia ia ka kaiphot yn sa phah sha u CEM jong ka KHADC ha kane ka taiew ban wan, hynrei haba peit sani ia ki kam khappud kane kam kan long kaba shibpor namar hap ban da wad bniah ia ki jingshisha baroh haba ia dei bad kam pud.
U EM ba dei peit ia kikam elaka u la ong ba ka District Council kala dep ban thung ia ka, kynhun kaba kyrpang ban peit ia ki kam khappud ia kaba la tip kum ka “Boundary Committee” bad kane kan lum ia ki jingthoh jngtar na ki Hima ha kaba ia dei bad u pud u sam.
U bah jambor u pynpaw ia ka jingsngewnguh ia ki hima kiba la ai ia ka jingiatrei lang ha kaba baroh ki hima kiba don ka jingiatyngkhuh pud bad ka jylla Assam kila wan ban ai ia ki kot ki sla sha KHADC ba kin pynshisha ia ki jaka jong ki ha khappud.
Ki hima kiba la wan ai ia ki kot ki sla ki long, ka Hima Raidmynsaw, Rambrai, Nongspung, Nongkhlaw, Sohiong, Jirang, Nongpoh, Mylliem bad Khyriem, na ka liang jong ki hima kila ia trei lang bad ka KHADC ban pynbiang ia ki kot ki sla ha kaba ia dei bad ki kam khappud.
