Mairang, Nailar 06: U Sub-Divisional Magistrate ka Mairang Civil Sub-Division, Mairang ha ka hukum bala pynmih mynta ka sngi u la pyntip ba naka daw jong ka jingiaikiew stet jong ka jingdon ki nongpang COVID-19 bad ki High Risk Contact ha ka Shnong Umjakoit, Mairang Civil Sub-Division, la pynbna ia kane ka shnong kumka Containment Zone kum shi bynta ban the lakam ia ka jingsaphriang jong u khniang jingpang COVID-19.
Kat kum kane ka hukum, yn ym shah iano iano ruh ban rung ha katei ka Containment Zone lait noh ki nongtrei jong ka tnat ka koit ka khiah bad kito kiba la ioh jingbit na u Incident Commander ba dei peit ia kane ka shnong bad baroh ki nongshong shnong ki dei ban shongkhop ha la iing.
La bthah ruh ia baroh ba kidei ruh ban deng mask tikna, kim dei ban ia khleh bad kiwei pat bad kidei ban sngap thuh bha lada ki don kano kano ka jingsngew shitmet ne jyrhoh ne dap shadem bad jynjar ban ring ne pynhiar mynsiem. La kyntu ruh iaki ban ia shim bynta ryntih ha ka jingtes ia ka jingpang COVID-19 ha ki dong ki jong ki da ki nongtrei jong ka tnat ka koit ka khiah ka sorkar jylla.
Shuhshuh, baroh ki dukan kiba don ha ka Shnong Umjakoit kin khanglut bad kino kino ki kam shnaiing ne shna surok ki dei ban sangehnoh mardor. Kino kino kiba pynkhein ia katei ka hukum kin shah pynshitom kat kum ki kyndon ain jong ka Disaster Management Act, 2005 bad ka IPC.
Lah ban kdew hangne ba kat haduh mynta ka sngi, ki don haduh 17 ngut ki nongpang COVID-19 hapoh ka shnong Umjakoit.
