Shillong, Nailar 14: Ka Synjuk ki Nongsynshar Shnong Kabri Hynniewtrep, ha dien ba la ia shong ban ia kren halor kane ka jingjia ia u bah Chersiterfield Thangkhiew, na ka liang jong ka synjuk ka phah ia ka khubor sngewlem sha ka iing ka sem bad kum juh ruh ia ka dorbar shnong Mawlai Kynton Massar.
U bah Rap Blah President ka synjuk haba kren ha ki lat pathai khubor u la ong ba kane ka jingjia kala ktah, ym tang ia ka Kynton Massar, ne ka Mawlai Town Dorbar, hynrei kane kala ktah ia baroh ki dorbar shnong hapoh ka Bri u Hynniewtrep.
Baroh shikatta na ka liang jong ki ai ka kti kamon ka kti ka diang bad ka sorkar hynrei da poi kum kine ki khep la iaid lait ia ki bor shnong, hynrei la kumno kumno ruh la dei ban kynjoh ktien bad pyntip sha u rangbah shnong ba ki la don hapoh shnong ba ki wan na katta katta ka daw.
Lada ki wan ha kata ka rukom khlem pep na ka liang jong rangbah shnong jinda la kloi ban mih ban leit khot ia u bah Cher ruh lada dei ba don kam, hynrei kum kane ka rukom leh khtam na ka liang ki pulit bad ka long kaba sngewsih eh namar ba ha ka jaka ban wan rah ia ka jingiatreilang ban pynneh ia ka shongsuk shongsain ma ki kiba bat ia ka ain ki pynshong syier.
Kane ka jingleh ka pynduh ia ka jingshaniah na ki paidbah bad kum ki shnong ruh ki sngew blaw ba jia kumne, ha ka jingshisha lada ka iaid da ka lynti kaba dei, lada dei ban kem ia u briew kem ia u briew, hynrei ymd ei ban dkhat ia ka jingim jong u briew hapoh ka iing ka sem ka jong u.
Kum ka synjuk ka khmih lynti ba ai kane kan long ka sien kaba khatduh kum kine ki jingjia hynrei kanbuh ia ki dorbar shnong ha ka jingeh kaba khraw ha ka jingiadei bad ka sorkar nangne sha khmat lada kum kine ki jingjia kin iai jia.
Kum ka synjuk ka khmih lynti, khatam kibriew kiba bat ia ka ain ka tnad pulit ha ka jaka ba kam pynjai jai da ka jingleh jong ka kumne ka dang pynkhluid bad pynsyier ia ki briew ki duh ka jingshaniah.
Ka Synjuk ka ai ka jingkyrshan ia ka dorbar shnong Mawlai kynton Massar bad kum juh ruh ia ka Mawlai Town Dorbar bad ia baroh ki dorbar shnong ba dkum kine ki jingjia kim dei ban jia shuh bad ka synjuk ka pynrem jur ia kane ka jingjia.
Ka Synjuk ka dawa da ka “Judicial Inquiry” bad u ban tohkit ia kane dei ban long da u nongbishar jong ka High Court, ka jingtohkit ka dei ban long kaba laitluid bad kum ka synjuk kin sa leit ban ia kynduh ia u Mytnri rangbah ka jylla halor kane, la ong u bah Rap Blah.
