Shillong, Nailar 21: Ka Khasi Students’ Union (KSU) Jaiaw Circle, ka ai ka jingkyrshan kaba pura ia baroh ki Dorbar Shnong Ka Jaiaw Pyllun, Ki Dorbar Shnong ka Mawlai Pyllun, ki Seng Samla bad Sengbhalang, halor ka rai ban weng noh shi syndon ia ka ktem CRPF.
Kine ki ktem jong ki CRPF kawei kaba don ha ka shnong Mawlai Nongkwar, kaba dei ka jaka jong ka Arts and Culture bad kumjuh ruh ia ka Camp CRPF kaba don ha Jingkieng Mawlai, kaba hap hapoh ka Jaiaw Laitdom Dorbar.
Ka jingjia kaba lah jia ha ka miet jong ka 15 tarik Nailar 2021 ka la pynpar niangkhriat ia ki paidbah nongshnong shnong ha kaba ki Pulit CRPF ki la shu bom shu tied kulmar bad pynjulor lut naphang ia ki iing ki sem jong ki nongshong shnong ka Mawlai Nongkwar.
Kane jingleh riewkhlaw ki shipai CRPF kam dei shuh ka sien kaba nyngkong hynrei kum kine ki jingjia ki la juh jia na ka por sha ka por naduh ki snem ba ki lah ioh ban bsuh khlieh ha kitei ki jaka.
Ka jingdon jong kine ki camp ka wanrah ia ka jingbym shongshngain shuh namar ka jingshah thombor ki paidbah nongiaid lynti kiba hap ban iaid lyngba na kitei ki jaka kaba lah pynthud bad pynjynjar shi katdei eh.
Ka jingleh ki CRPF, ka ktah ym tang ka Shnong Mawlai, hynrei ia baroh ki Shnong kiba markhap kum ka Jaiaw, Mawprem bad kiwei ki Shnong kiba hap ban iaid lyngba na kitei ki jaka.
Na ka liang ka Seng ai ka jingkyrshan kaba pura ia ki dorbar Shnong jong kine ki shnong kiba da kawei ka sur ki la dawa ban weng noh mardor ia kitei ki Camp CRPF.
Khnang ba kum kine ki jingjia kin ym jia shuh nangne shakhmat bad ban ioh biang sa shisien pat ia ka shongsuk shongshgain jong kane ka dong ka thain hi baroh kawei. Ka kyrwoh na u Samla Melajied Khongbuh, Publicity Secretary KSU Jaiaw Circle
