Shillong, Nailar 24: Mynta ka sngi ki paidbah jong ki lai tylli ki shnong kila ia mih paidbah ban pynpra ia ka khyrdop kaba la shna da ki pulit jong ka jylla Assam hapoh ka shnong Umlaper hapoh jong ka Ri Bhoi District.
Kane ka jingiamih paidbah ka long ha dien ba ki pulit Assam kila shoh ia ki ar ngut ki briew jong ka jylla Meghalaya ha ka por miet ha katei ka shnong Umlaper, kumta ki paibah na ka shnong Ummat, Pdengtleit ruh kila ia mih ban pynpra ia katei ka khyrdop bad phah mih syndon ia ki pulit na katei ka shnong Umlaper.
Kane ka jingmih ka kynrum kynram ha ka ne ka thain ka dei hadien ba don na ki Khynnah samla na ka shnong Umlaper ki la shah shoh ha ki pulit jong ka jylla Assam ki ba ieng pahara ha ka ne ka khyrdop hynnin ka miet.
U MDC ka Mawhati Constituency u bah Charles Marngar mynta ka sngi hadien ba u la ioh jingtip halor kane ka kynrum kynram u la hiar sha kane ka thain ban jurip ia ka jinglong jingman hadien ba kala don ka jingktah kti ki pulit Assam ia ki riew paidbah ha katei ka shnong Umlaper.
Ha ba ia kren bad ki lad pathai khubor na ka liang u bah Marngar u la ong ba hadien ba ka la don ka jingshim khia jong ka Sorkar Jylla na ka liang ka Sorkar Assam ka la weng noh ia ki CRPF ban pahara ia ka ne ka jaka hynrei wat ki la weng ia ki CRPF ki la shna pat da ka khyrdop bad buh da ki pulit jong ka ban pahara ha ka ne ka shnong.
Hynrei hynnin ka miet na ka liang ki pulit Assam ki la talasi ia kawei ka kali ki ba don ar ngut ki khynnah samla na ka shnong Umlaper, bad ki la shoh la dat ia kine ki khynnah samla.
La iathuh ba namar kane ka jingjia na ka liang ki Paidbah Nongshong Shnong jong ka shnong Umlaper, ka Shnong Ummat bad ka shnong Pdengtleit mynta ka sngi ki la mih paidbah ban pynpra noh ia kine ki khyrdop ba la buh da ka Assam bad ki la dawa ruh ia ki pulit Assam ba ki dei ban mih shi syndon na ka shnong Umlaper.
Kum ba shikynta hadien kane ka jingjia haka ne ka shnong la wan u DSP ,bad u bad incharge jong ka Mawlasnai Outpost, bad kumjuh na ka liang ka jylla Assam la wan poi U SP, DSP, ADM, bad Border Magistrate, bad kumjuh ruh u SP jong ka Hamren West Karbi Anglong.
Hadien ka jingiakren hapdeng arngut ki SP na ka liang u SP ka Hamren u la pdiang ban weng noh mardor ia ki pulit na kane ka jaka bad ban weng noh ia ka khyrdop ba la buh ha kane ka shnong kaba la dep pynpra da ki paidbah nong shong shnong.
U bah Charles u la ai ai khublei kyrpang ia ki paidbah kane ka thain na bynta ka jingiatylli bad ka jingshlur ka jong ki, bad u la ai khublei ruh ia ka tnad pulit ka RiBhoi District hapoh ka jingialam u SP bah N Lamare, kumjuh ruh ia u DSP, ADM bad Border Magistrate ki ba la shimkhia mardor ban pynbeit ia kane ka kam.
