Shillong, Nailur 10: Mynta ka sngi la sdang ka jingisahong dorbar synrai ka iing dorbar thawain ka jylla kaba 6 sngi, ia kane ka jingbuh sngi la pdiang da ka iing dorbar ha kaba lai sngi kan long na ka bynta ki kam jong ka sorkar bad lai sngi na ka bynta ki liang pyrshah.
Ha kane ka sngi sdang jong ka dorbar synrai u myntri ba dei peit ia ka tnad khlaw u James K Sangma u la wanrah hapoh ka iing dorbar ia ka Meghalaya Forest Regulation (Amendment) Bill 2021.
U Myntri rangbah ka jylla u Conrad K Sangma ba dei peit ruh ia ka tnad pla pisa jong ka sorkar jylla u la wanrah hapoh ka iing dorbar ia ka jingpan pisa shuh ban pynlut ha ki tnad sorkar bapher bapher.
Ka iing dorbar ha kane ka sngi kala pynlong ruh ia ka jingkynmaw burom ia ki MLA kiba la khlad noh hapoh kine ki hynriew bnai, kiba khlad baroh ki long 20 ngut, na ka jylla Meghalaya ki don lai ngut, u Bah Obil Kyndait, bah Maysalan Suchiang bad u Dr. Phlore Khongjee.
Ia kane ka jingkynmaw burom ia kiba la khlad la kren sdang da u myntri Rangbah ka jylla u Cornad K Sangma bad la bud sa nongialam ka liang pyrshah u Dr Mukul Sangma, kiwei dei kiba la kren ha kane ka sngi ki long u bah P T Sawkmie bah Mayralborn Syiem MLA bad kiwei.
