Shillong, Nailur 15: U Myntri ba dei peit ia ka tnad bor ding u James K Sangma haba jubab ia ka jingkylli u bah George B Lyngdoh ha kaba ia dei bad ka jingpynioh dingeletrik ia ki nongshong shnong ha Umiam Block-5 la pyntip hapoh ka iing dorbar ba ki don 25 tylli ki iing kiba la pynioh bor dingeletrik.
Haba jubab ia ka jingkylli bynrap haba ia dei bad ka jingiasoi soskular hapdeng ka board bad ki nongshong iing, u myntri u la ong ba ha katei ka Block-5 ki long iing baroh ki don 83 tylli bad kiba la ioh ia dieng eletrik ki long 25 tylli ki iing.
Kitei ki 25 tylli ki long iing kiba laioh light dei kiba la soi ia ka soskular ban ong ba ka jaka kaba ki sah ka dei jong ka MeECL, na ka liang jong ka sorkar kala shim ia ki lat ki lynti baroh ban iarap ia ki briew ba don ha kane ka jaka.
La iathuh hapoh ka iing dorbar ba ka sorkar kala mang pisa T.8 lak tyngka ban buh ia u Transformer ban thung biang iaki dieng post eleltrik ha katei ka Block-5 ha Umiam.
Ha kawei pat ka jingkylli u myntri ba dei peit ia ka tnad shna iing u bah Dasakhiatbha Lamare haba jubab ia ka jingkylli jong u bah Mayralborn Syiem ha kaba ia dei bad ka jingtei ia ka Polytechnic ha Nongkhrah-Pahambir Nongpoh, u myntri la ong ba ka jingslem ka dei na ka daw jong ka jingbym ioh jaka ha kaba ym lah ban sdang ha ka por ba biang.
Ka jingwan kane ka COVID-19, na ka liang jong ka sorkar kala shim bun ki lat ki lynti ban pynkloi ia kane ka jigntrei bad la kyntu ia u kontrator ban bteng ia ka jingtei ia katei ka jaka pule ka sorkar kala pan ia ka jingiarap jong u MLA ban ioh ia ka jaka, ia kane ka jingtrei la buh por ban pyndep ha u bnai Nohprah 2022.
Haba jubab ia ki jingkylli bynrap u myntri u la iathuh hapoh ka iing dorbar ba ka jingmang pisa ia kane ka jaka ka long T.8.37 klur hynrei la khot ia ka tender ha dien bala khein ka long T.7.5 klur bad kane ka long tang ia ka iing bad ia ka light hapoh iing, kam shym kyntup lang ia kiba sha bar lane ka surok.
Haba ia dei bad kane u mytnri rangbah ka jylla u la ong ba ka sorkar ka kwah ban pyndep ia kine ki jingtrei kiba la iaid sha khamt bad ki jingeh kin don hangne hangtai, ka jingkwah ka sorkar ka long ban pyndep ia kane ha ka jaka pule ha ka por ba biang.
