Shillong, Nailur 16: U Myntri kam poh iing ka jylla u bah Lahkmen Rymbui haba jubab ia ka jingkylli jong u Winnerson D Sangma haba ia dei bad ka jingwan rung beain ki briew ha kane ka jylla, la ong ba ha ki lai tylli ki District la thung ia ki Superintendent ki Pulit ba dei peit ia ka Infiltration bad ki don 30 tylli ki kam kiba la thung ha ki District.
U Myntri u la jubab ba ha ki lai snem kiba la leit la ioh ban pynphai haduh 16400 ngut kiba la wan rung sha Meghalaya khlem biang ki kot ki sla, haduh snem 2018 ki don 5460 ngut, ha u snem 2019 ki don 7626 ngut, ha u snem 2020 ki don 2122 ngut, mynta u snem 2021 haduh u 1/9/2021 ki long 1192 ngut, ia kine baroh la pynphai noh sha Assam.
Ka jingioh bat ia ki khar Bangladesh ha kine ki lai snem ki don 116 ngut, ha u snem 2018 la ioh ban kem 36 ngut, ha u snem 2019 la ioh ban kem 18 ngut, ha u snem 2020 ki don 37 ngut, mynta u snem 2021 haduh ka 31/8/2021, na kine kiba la shah kem 44 ngut la phah biang sha Bangladesh bad 72 ngut la set phatok ia ki.
Haba jubab ia ka jingkylli bymrap jong u bah Hima ha kaba ia dei bad ka Infiltration kaba don ha Hat Mawdon, la ong ba ka sorkar kan sa peit ia ka jingai jingmut jong u MLA haba ia dei bad katei ka jaka ban don ia ka Police Outpost.
