Shillong, Nailur 16: U Myntri Rangbah ka Jylla, u Conrad K Sangma haba jubab ia ka mat ia kren kaba kyrpang ha kaba ia dei bad ka kam ia kajia pud bad ka jylla Assam,da u bah Mayralborn Syiem, bah Himalaya Shangpliang, Kimfa S Marbaniang bad kong kong Ampareen Lyngdoh.
U Myntri rangbah ka jylla u Conrad u la ong ba ym shym la kular ba ka Sorkar MDA kan lah ban pynbeit noh ïa u pud u sam bad ka Jylla Assam, hynrei ka wad ïa ki lad ki lynti ban pyrshang, namar kane ka mat ka long kaba eh, kaba la slem bad kaba kyllain.
Haba jubab ïa ka ‘special motion’ ba la wanrah da ki MLA ka Congress hapoh ka ïingdorbar ha ka sngi Palei jong ka Dorbar Synrai, u Conrad u la ong ba ka jingthaw ïa ka committee ba 5 ngut kam mut pat ba kin don beit tang 5 ngut, hynrei yn pdiang bad shim ruh ïa ki jingai jingmut jong baroh kiba don bynta bad ki nongïalam shnong.
U la ïathuh ba ha ka jingïakynduh ba ar sien hapdeng ki Myntri Rangbah jong ka Jylla Meghalaya bad Assam, ki la mynjur ba ki don 12 tylli ki jaka ba ïa kajia, bad ka jingïakren kan long beit ïa kita ki jaka, ha kaba yn sdang shwa na ki 6 tylli ki jaka ba kham duna ka jingïakajia.
U la ong ba ka Sorkar MDA ka la shim ïa ki kot ki sla ba la pynkhreh da ki Sorkar kiba la leit, bad pynpaw ba kin long ki jingmyntoi bha ki kot ki sla ba la don lypa.
Hynrei u la ong ba kan long kaba eh ruh ban kam ïa ki jaka tang da ki kot ki sla ba la don namar ka Assam ruh ka don ïa la ki jong ki kot ki sla ban kam ïa ki jaka, bad bynrap ba kaba eh mynta ka long ba ki kot ki sla jongno kiba dei.
Shuh shuh u Conrad u la ong ba mynta hap ban peit ïa ka jinglong jingman bad ka rukom im ha ki khappud, bad ia ka jingsngew ki paidbah bad ki bor synshar, u la ong ruh ba ka Sorkar kam kwah ban kam ba kan lah ban pynbeit, hynrei kan ïaleh ban pynbeit namar ki briew kiba sah ha khappud ki la im ha ka jingsyier bad ym tip aiu kan jia ha ka sngi kaba bud bad mynta dei ban wad ïa ki lad.
Halor ka jingkren u Myntri Rangbah ka Assam, u Himanta Biswa Sarma ba dei ka Meghalaya ka kam bad tam pud ïa ki jaka, u Conrad u la ong ba um tip balei u CM ka Assam u kren ïa kita ki ktien, hynrei u la ong ba lehse ka jingmut jong u Myntri Rangbah ka Assam ka dei namar ba ïa ki Jylla hapoh ka thaiñ shatei lam-mihngi la phiah na ka Assam naduh ba sdang.
Ha kajuh ka por u Myntri Rangbah u la ong ruh ba ym lah ban kyntait ba ki don shibun ki jingjia ha khappud, ha kaba ka la don ka jingpyrshang ban pynbeit kloi naduh ki block officer ter ter shaduh ka kyrdan u Chief Secretary, bad bynrap ba ka Sorkar haba ka ïoh jingtip ba don kino kino ki jingjia tang shu ïoh jingtip ka la ïakren mar mar bad ka Sorkar Assam, ha kaba u la ïathuh ruh ba na baroh arliang la kyntu ban kiar na kino kino ki jingjia katba dang ïaid ka jingïakren.
Ha shwa ïa kane haba wanrah ïa ka ‘special Motion’ na ka liang ki MLA ka Congress, u Bah Hima Shangpliang u la buh jingkylli ïa ka jingmut ban ïa ai bad shim jaka mar kylliang ne kata ka ‘give and take policy’, da kaba u la pynpaw ka jingpyrshah ïa kane ka jingthmu bad ong ba ki jaka ba dei jong ka Meghalaya kim dei ban leit sha ka Assam bad kiei kiba ka Assam ka la dep klun dei ban pynïoh biang sha ka Meghalaya.
U MLA ka Nongpoh, u Bah Mayralborn Syiem u la ong ba ka Sorkar ka dei ban phah tohkit halor ka jingpynkheiñ ïa ka Land Transfer Act, namar ki don ki briew haduh mynta kiba die pathar ïa ki jaka ha khappud.
U MLA ka Umroi, u Bah George B Lyngdoh u la buh jingkylli ïa ka Sorkar halor ka jingphah pyrton ka Assam haduh 4000 ngut ha ki jaka khappud, bad kumjuh ïa ka jingkam jong ka Assam ba kam don satia ka jingïa kajia khappud bad ka Meghalaya, hynrei dei ka Jylla Meghalaya kaba kam ïa ki jaka jong ka Assam.
Katba u Nongïalam ka Liang Pyrshah u Dr Mukul Sangma u la ong ba ki MLA ka Liang pyrshah ki kyrshan ïa ka Sorkar halor ka jingthmu ban pynbeit ïa u pud u sam lada ka Sorkar ka leh ha ka rukom kaba dei.
Kiwei kiba la kren halor kane ka phang ki long u Bah Kimfa S Marbaniang, u Zenith Sangma, u Bah Sosthenes Sohtun, Bah Process T Sawkmie, u Esmatur SG Mominin, Kong Ampareen Lyngdoh, Bah Adelbert Nongrum, Bah Lambor Malngiang bad u Rakkam A Sangma.
