Shillong, Risaw 06: U bah Eugeneson Lyngdoh u nongialehkai kynjatboll ba paw jong ka Ri India mynta ka sngi la thep kyrteng ban ia khun ia ka MLA ilekshon shiteng samoi na ka 24-Mawphlang (ST) Assembly Konstitwensi hakhmat u retuning ophisar u Malthus S. Sangma ha ophis jong ka Deputy Commissioner jong ka East Khasi Hills District.
Haba kren ha ki lat pathai khubor ha dien bala dep ban thep kyrteng u bah Lyngdoh u la ong ba ka jingpoi jong u sha ka party UDP ban ia khun ia kane ka MLA ilekshon shiteng samoi dei na ka jingkwah jong ki paidbah namar u kpa jong u bah Syntar Klas Sunn bam kwai ha dwar u blei u la pyniasoh bad ka UDP.
U bah Lyngdoh u la ong ba ka jingangnud ka jong u haba u shim ia kane ka rai poi sha ka sian pyrthei ka long ha dien ba ki nongkyrshan kila wan ban ia kren bad kumba la iarai ban ia khun na ka party UDP ban pyndep ia ki kam kiba u kpa jong u dang pynsah teng.
U Bah Eugeneson u la pynpaw ba u don ka jingkyrmen kaba skhem ba ki paidbah ka Mawphlang kin ai ka jingkyrshan ia u ha kane ka ilekshon shiteng samoi ba un poi sha ka jingjop ba un lah ban beteng ia ki kam kiba dang sahteng jong u kpa.
Ha kane ka jingleit ban thep kyrteng mynta ka sngi la synran lang da u President ka East Khasi Hills jong ka party UDP u bah Titosstarwell Chyne CEM jong ka KHADC, u myntri kam poh iing u bah Lahkmen Rymbui, u MLA bah Nujorki Syngoh, bah Teinwell Dkhar MDC lem bad ki nongkyrshan ka party bad kiba ha iing ha sem.
