Shillong, Risaw 07: Mynta ka sngi ki ar ngut ki candidate jong ka party national people party, u bah Pyniaid Syiem u la thep kyrteng ban ia khun ia kane ka ilekshon shiteng samoi na 13-Mawryngkeng konstitwensi bad u bah Lamphrang Blah na 24-Mawphlang Konstitwensi.
U National President ka party NPP u Conrad K Sangam haba kren ha phyllaw ka ophis jong ka party shuwa ban leit thep kyrteng u la ong ba ka party ka don ka jingkyrmen ban jop ha baroh lai tylli ki Assembly Konstitwensi, ka nongrim kaba ka party kan jop ka long halor ki kam kiba ka la leh ha kine ki lai snem shiteng.
Haba ia dei bad ka jingia dei bad kiwei ki party kiba ia don lang ha ka sorkar MDA, u myntri rangbah u la kren shai kdar ba wat la ki ia don lang ha ka sorkar, hynrei haba poi ka ilekshon ki lah ban buh ia la ki jong ki kyrtong, lada kim pynieng kyrtong kin ia kyrshan lang.
Kane ka jingkren ka mih ha dien ba ka UDP bad ka NPP kila pynieng iala ki jong ki kyrtong ha 24-Mawphlang bad ha 47-Rajabala, katba ha 13-Mawryngkeng ka UDP ka ain ka jingkyrshan ia ka NPP namar kam shym buh kyrtong.
Haba phai sha ka party Congress u la ong ba ka Congress ka dei ka iing kaba ia paid hapdeng jong ki, dei na kane ka daw ba shuwa ka party kan kren ka dei ban pynbeit shuwa ia ki jingeh hapoh ka party congress shuwa ban kynthoh ia kiwei.
Ha kane ka sngi ban leit thep kyrteng ki nongialam jong ka party NPP kila pynlong ia ka jingiaid kjat na ophis ka seng sha DC ophis ha kaba la ialam da u myntri rangbah ka jylla u Cornad K Sangma, u Symbut Myntri Rangbah ka jylla u bah Prestone Tynsong, u bah Sniawbhalang Dhar myntri, bah Gigur Myrthong MLA bad kiwei ki nongkit kam jong ka party.
Ha kane ka sngi ki nongkyrshan u bah Pyniaid Syiem bad ki nongkyrshan jong u bah Lamphrang Blah kila ia don lang ha kane ka sngi, kine ki kyrtong baroh ar ngut haba kren ha ki lat pathai khubor ki kyrmen skhem ba ki paidbah kin ai ka jingkyrshan ban poi sha ka jingjop.
