Shillong, Risaw 09: Ka seng JSU mynne ka sngi ka lah pynlong iaka jingkynduh lang ki dkhot ka CEC na kylleng ki Unit bad ki Circle ryngkat ba ki nongialam ka seng kmie ka seng.Ia kane ka CEC lah pynlong ha Orchid Hall Thadlaskein bad kumba da ki spah ngut ki dkhot na kylleng ka ri Jaintia bad na nongbah Shillong ki lah wan sha kane ka jingialang.
Iaka jingialang lah pyniaid da u President rangbah ka seng u samla Jersom Shylla bad iaki mat iathir lah lam khmat da u General Secretary rangbah ka seng u samla Treiborlang R Suchen bad ia ka kyntien ai khublei lah ai da Vice President ka seng u samla Aplang Lamare.
Ka CEC jong ka seng ka lah shim ia ka rai ban wer lang ia baroh ki dkhot bad ki nongialam barim ka seng ban ia don ryngkat ha ka sngi rakhe dap 50 snem ka seng ha u ne snem ban wan .Ka seng ka shim ruh iaka rai ban tei noh la ka jong ing treikam ne ka ophis treikam hapoh ka jaka ba ka seng ka lah ioh sngewbha ha ki snem ba lah dep hapoh shnong Jowai.
Ka CEC ka seng ka lah rai ruh ba yn iaid shakhmat iaka jingdawa ILP hapoh ka jylla namar ka seng naduh ki nongialam kiba rim kata naduh u snem 1983 ter ter ka seng ka ieng haka nongrim ban dawa ban pynioh ILP hapoh ka jylla Meghalaya baroh kawei.
Ka CEC ka lah shim ia ka rai ba kan ym kynran dien bad pyrshah beit ia ka jing den ia ka wah Umngot namar ka ktah iaki nongshong shnong ka Elaka Darrang bad kiwei khamtam namar ka ktah iaka tourism hapoh ka jylla bad ki ba im ja na ka wah umngot kiba rep ba riang harud jong ka wah.
Ka CEC ka ieng skhem ban pyrshah beit ia ka jingleh bor ka sorkar jylla ban iarap iaka Star Cement ban pynioh Environmental Clearance na ka sorkar kmie wad haba ka sorkar ka tip shai ka ktah iaka wah ka bad ki doh um bad ki khlaw ki btap kum ka Narpuh Wildlife Sanctuary bad Eco Sensitive Zone bad ka jingpynjaboh iaka Wah Lukha.
Ka CEC ka lah rai ruh ban dawa na ka sorkar ban wanrah ia ka tnat pule kaba biang hapoh ri lum Jaintia, ban dawa ban wan rah ia Extension Building jong ka Kiang Nangbah Governmeent college bad skul sorkar ha East Jaintia Hills bad ka seng ka dawa ba dei ban shna noh iaka Civil Hospital hopoh East Jaintia Hills District.
Haba ai jingkren u samla Jersom Shylla u lah ong ba ka seng ka ieng ha ka nongrim kaba skhem halor kino kino ki mat jingdawa bad ka seng JSU kan ym pyndem da lei lei ha khmat ka sorkar na bynta kaba bha ia ka jaitbynriew baroh ka wei.
U samla Treibor R Suchen ha ka jingkren ka jong u,u lah ong ba ka seng JSU kadei ka seng kaba lah pynmih shibun ngut ki nongialam bad ki riew ba stad bad shemphang hapoh ka imlang ka sahlang.
Ka JSU haduh mynta ki paitbah bad jaitbynriew ki dang shaniah iaka hynrei ka jingbun palat kiwei ki seng ha ri lum Jaintia ka pynkulmar jingmut ia u paitbah ka jylla bad ki nongshong shnong ka ri lum Jaintia.
U lah ai mynsiem iaki dkhot ka CEC da kaba ong ,”Trei shitom ban tynrong iaka jaitbynriew khlem da kwah burom bad u Blei un sa theh sei iaka jingkyrhu ha ngi iwei iwei pa iwei na bynta ki kam ba bha kaba ngi lah leh”.
