Shillong, Naiwieng 09: U Chief Executive Member ka KHADC, u Bah Titosstarwell Chyne haba jubab ia ka jingiakren halor ka phang ba ia dei bad ki kam khappud la ong ba KHADC kan ieng halor ka nongrim katkum kikot kisla jong ki Hima ba ki don.
Kane ka long halor ka jubab kaba ia dei bad ka mat kaba la wanrah da u bah Charles marngar MDC ka Mawhati, u CEM jong ka KHADC la ong ba kila dep ban thoh sha ka sorkar Assam bad Meghalaya ban pynsangeh ïa ka jingtei hapoh ki jaka jong ka KHADC, khamtam ïa ka transit camp kaba don ha Khanapara.
U la ong ba ka Executive Committee haduh mynta ka dang buddien ïa kane bad ka la ai ruh ïa ka jingpynkynmaw ha ki khyndiat bnai ba la dep. Ha kaba ïadei bad ka jingdie jaka jong u Syiem ka Raid Marwet, u CEM u la ong ba ka dei ka kam kaba khia ba ka KHADC kan leh da kaba tyngeh.
Ha kajuh ka por u CEM u la ong ba ka Boundry Committee jong ka KHADC ka la phah ïa ka kaiphod bad shen ka KHADC kan sa shong ban bishar ha kaba kan sa shim pat ïa ki rai ba donkam.
Haba kren halor ka phang kam pud kam sam u bah Charles Marngar MDC ka Mawhati u la ong ba ka Khasi Hills Autonomous District Council (KHADC) ka dei ban pyni ïa ka jingkhlaiñ bad ïa ka bor ha kaba ïadei bad u pud u sam ka Jylla.
U la ong ba na ka liang ka Sorkar Jylla bad ka Assam ka la leit ban khmih ïa ki jaka ha khappud ba don ha Ribhoi District, hynrei kaba sngew lyngngoh ka long ba ha ka jingjurip ha ka thaiñ Khanapara da u Symbud Myntri Rangbah ka Jylla bad ki dkhot ka Boundry Committee jong ka Assam kiba la ïakynduh ïa ki paidbah, ki kylli pynban, kane ka jaka ka hap shano.
Haba wanrah ïa ka mat ïatai hapoh ka Dorbar tlang ka KHADC ha ka sngi Ba-ar, u Bah Charles u la ong ba ha katei ka jingjurip ka la mih ruh ka jingkulmar bad jingsngewsih halor ka jingkylli ki nonghiar jurip ba ka jaka ka hap shano.
La ong ba namar ki nongshong shnong kiba sngewieid ïa ka Asssam ki ong ka hap sha Assam, don pat kiba ong ba ka hap sha Meghalaya. U la ong ba ha ka jingshisha ki MDC jong ka Council ki la dei ban don lang ha kato ka sngi namar ka KHADC ka don ïa ka bynta kaba khraw ïa u pud u sam.
U la pynpaw ruh ba ka Council ka la dep kren ha ka Regional Boundry Committee ba la thung da ka Sorkar ba ïa u pud u sam dei ban pynbeit katkum ki kot ki sla bad katkum ki jingshisha ba la buh da ki mynbarim.
U Bah Charles u la ïathuh ba u la ïoh jingtip ba ka jingïakajia kaba la mih ha ki bnai ba la dep ha ka shnong Ïongkhuli, kam dei satia tang namar ka jingbuh ïa ki post ban pynpoi bording, hynrei ka daw bah ka dei namar ka jingdie pathar ïa ki jaka sha ki bar Jylla da ki nongsynshar shnong.
U la ong ba ka KHADC ka dei ban khot hajir bad pan jingshai ïa ki briew kiba die duh ïa ki jaka, bad lada lap ba ki donkti dei ban pynshitom ïa ki.
Shuh shuh u Bah Charles u la ong ruh ba ha ka jingïakynduh ka Deputy Commissioner jong ka Ribhoi District bad ka Deputy Commissioner jong ka Hamren, la ïakren ba ki kam pynroi kin ïaid beit, hynrei kaba sngewsih ka long ba ïa ki kam pynroi ba rit ka Meghalaya bad wat ïa ka skhim JJM kaba dei jong ka Sorkar Kmie ym shym la ïohlad ban pyntrei.
Une u MDC ka Congress u la ïathuh ruh ba watla ka la don ka jingïakren hapoh ka Boundry Committee bad ka jingpynbeit ïa u pud u sam ka dang ïaid, hynrei ka jingtrei ïa ka Transit Camp da ka Sorkar Assam ha Khanapara ka dang ïaid shaid shaid, ha kaba u la ong ba kane ka long kaba sngewsih ba ka Sorkar kam shim ïa ka KHADC kum ka bynta kaba khlaiñ ban pynbeit ïa u pud u sam.
Haba shim bynta ha kane ka jingïatai, u MDC ka Congress na Rambrai-Jyrngam, u Bah Bajop Pyngrope u la ong ba ka long ka jinglehraiñ ba ha ka Regional Committee ba la thung da ka Sorkar na baroh ar tylli ki Jylla.
Ia ka Jylla Meghalaya la shah ban don tang 7 ngut ki dkhot katba na ka Assam ki don haduh 40 ngut kiba mihkhmat ha ka jingïalang kaba la long ha Assam kiba la pynbiang ïa ki kot ki sla ban kam ïa u pud u sam.
Ha kawei ka liang, u Bah Bajop u la ong ba watla ka KHADC ka la dep mang ïa ka ka pisa T.30 lak na ka bynta ban tei ïa ka police outpost ha Langpih, hynrei ka Sorkar Jylla ka la ai daw ba ym lah ban pyntrei mynta ïa ka outpost namar katei ka kam ka dang ïaid ha ka jingïakren.
