Nongkrem, Naiwieng 12: Hapdeng ka jingbud ryntih ia ki SOP ba la pynmih da ka tnad ka koit ka khia mynta ka sngi ka Hima Khyrim ha ka rukom ba iphuh i phieng ka la pyndep ia ka jinglehniam Shad Nongkrem bad ka Pomblang lyngka ha phyllaw jong ka ing sad.
Ki riew pawkhmat ki ba la wan ban sakhi lang ha ka ne ka sngi ki long u Lamphrang ka ingdorbar u bah Metbah Lyngdoh ,u Symbud Myntri rangbah ka jylla u bah Prestone Tynsong ,u CEM ka KHADC u bah Titos W Chyne bad kiwei kiwei .
Ha ka ne ka sngi ki don haduh 114 ngut ki nongshad ki ba la wan ban shim bynta na kine 62 ngut ki dei ki kynthei bad 52 ngut ki dei ki shynrang.
Ha ba ia kren bad u Paiem Balajied Syiem u la ong ba ha u ne u snem ka la don ka jingkiew ha ka jingwan tuid ki paidbah wat la ka khlam ka dang don hynrei ha ryngkat ka jingbud ia ki Protocol ki nongshad bad ki riew paidbah ki la wan tuid sha kane ka jaka haba ia nujor bad ka ba mynshem snem.
U la ong ruh ba “ka ne ka jingrakhe ia ka ne ka Shad Nongkrem jong ka Hima khyrim ka long ban teh ban song ia ki jait bynriew ha ka riti ka dustur ka ba ngi don”.
Ha ba ioh ban ia kren bad u bah Prestone Tynsong u la pynpaw ka jingsngewnguh ia u Blei u ba la ailad sa shisien ba ioh ban sakhi ia ka jinglehniam jong ka Hima khyrim .
“ ka jingsngewnguh kan long ia u Blei trai kynrad u ba la ailad ia ka Hima Khyrim ka la ioh ban wan ban sakhi ia kane ka jinglehniam ka duwai ka phirat ha ka ba ka ne ka sngi ka la long ka ba jop”.
U la bynrap ruh ba “Nga kyrmen skhem la shem snem ruh ngin ioh biang ban pynlong biang ia ka ne ka nguh ka dem jong ka Hima Khyrim bad U blei nongbuh nongthaw yn kyrkhuh kyrdoh ia ki khun ki raiot jong ka Hima”.
