Shillong, Nohprah 01: U Commissioner bad Secretary jong ka iing dorbar thawain ka jylla u Dr. Andrew Simons mynta ka sngi u la phah da ka jingthoh sha u Dr Mukul Sangma ba u dei ban pynshai hapoh hynniew sngi ia ka jingdawa mait kyrteng na ka Congress ia kaba la ujor da ka Dr. Ampareen Lyngdoh.
Ha ka shithi kaba la phah sha u Dr. Mukul mynta ka sngi na ka liang jong u Commissioner bad Secretary jong ka iing dorbar thawain ka jylla la thoh shai ba katkum ka jingbthah da u Lamphang ka iing dorbar thawain ka jylla la ong ba la ioh pdiang ia ka jingujor na ka Dr Ampareen kaba la dawa ban mait kyrteng na ka jinglong dkhot ka iing dorbar thawain ka jylla hapoh ki kyndon ka khyrngit kaba shiphew ka riti synshar ka Ri India.
Nalor kata ka Dr Ampareen kala ujor ruh hapoh ka rule kaba 6 jong ka ain kyntiap seng jong ka iing dorbar thawain ka jylla kaba la tip kum ka Meghalaya Legislative Assembly (Disqualification on Ground of Defection) Rules, 1988.
Na ka liang jong u Lamphang ka iing dorbar thawain ka jylla ha dien ba la peit bniah ia ka jingujor la bthah ban phah ia ka kotpi jong ka jingujor sha u Dr Mukul Sangma ban ioh ia ka jingpynshai halor ki jingkynnoh pyrshah ia u hapoh ka kyndon 7(3)(b) ban pynpoi ia ka jingpynshai sha ka Meghalaya Legislative Assembly Secretariat hapoh hynniew sngi naduh ka sngi ba la ioh pdiang ia kane ka shithi, kane ka long katkum ka shithi kaba la phah mynta ka sngi sha u Dr. Mukul na iing dorbar thawan ka jylla.
