Shillong, Nohprah 08: U Nongialam jong ka All India Trinamul Congress (AITC) u Dr. Mukul Sangma mynta ka sngi u la khot ia ki san ngut ki MLA kiba dang don hapoh ka party Congress ba kin pyrkhat bha noh bad ba kin pyniasoh noh bad ka AITC.
Haba kren ha ki latptahai khubor ha dien ba la dep ban leit ai ia ka jubab kumba la pan da ka ophis jong u Lamphang ka iing dorbar kumba la ujor da ka party Congress kaba la soi da ka Dr. Ampareen Lyngdoh, la ong ba u khot ia ki san ngut ki MLA ka Congress ba kin pyniasoh noh sha ka AITC.
Halor ka jingujor kaba la ai da ka Congress, u Dr Mukul u la ong ba kane ka dei ka jingleh tang ban pynthud ia ki ba kin ioh ia ka jingithuh bad ban pynsuki ia kiwei ba kin pyniasoh bad ka AITC, kane kam don ei ie ruh em, ia kane kila jubab ha ka jingthoh kaba la ai sa ka ophis u Lamphang mynta ka sngi.
U Dr, Mukul u la ong ba kane ka jingujor jong ka Congress kala kren shai ba ki leh namar ba kila kut lat, namar ba ki ujor tang ia ki 10 ngut ki MLA, katba ki don 12 ngut ki MLA kiba la mih bad kane kala long palat ia ka lai pawa katkum ka ain kyntipa seng ka kyndon kaba saw.
Ha kane ka sngi ki MLA kiba la ai poi sha kane ka jingleit ban ai ia ka jubab hapoh ka jingialam jong u Dr. Mukul ki don shiphew ngut, katba u President bad Charles Pyngrope bad u bah Himalaya Shangpliang ki khlem poi lang namar ki don hala ki jong ki kam.
