Shillong, Nohprah 14: U Myntri ba dei peit ia ka tnad khlaw u James K Sangma la iathuh ba ha ka jingialang jong ka kabinet mynta ka sngi kila ia kren halor ki hynriew tylli ki tnad sorkar ia kaba la pdiang da ka kynhun myntri.
Haba kren ha ki lat pathai khubor,u James la ong ba ka rai kaba nyngkong kaba la shim ha ka jingialang ka long ba ka Kabinet kala pdiang ia ki sngi shuti kiba ka sorkar kala buh nalor ki shuti sngi saitjian bad sngi u blei.
Ha kane ka jingialang la pdiang ruh ia ki rule ban pyntrei kam ia ka e-Court Fee Stamp, da ka jingpdiang ia kane ka rule ka jingiadie ia thied ia ki stamp kiba don kam kiba man ka sngi la lah ban thied na ki dukan kiba ka sorkar kan sa ai jingithuh ia ki nong die.
Ban iada ia ki nongtheid nongpet ka kabinet kala pdiang ban pyntrei kam ia ka “ Meghalaya State Consumers Protection Council, ka ban don ha ka jylla bad ha ki District kin don ia ki District Consumers Protection Council.
Ban pyniaid beit ia ki kam ia khlai ha ka jylla ka Kabinet kala pdiang ia ka Meghalaya regulations Gaming Rules bad da kane ka rule kiba pyniaid ia kum kine ki jingiakhali ki hap ban ioh ia ka Laisen bad kane ka laisen kan long ar klur na ka bynta shisnem.
Ka Kabinet kala pdiang ruh ia ki jingpynkylla ha ka ain Meghalaya Compulsory Registration kaba la long ain ha u snem 2012, kane ka jingpynkylla ia ka long ban pynioh ia ka jingiada ia ka kurim ban pynioh ia ki jingmyntoi bad ia kane yn peit noh na ka tnad ERTS.
Ban pynkhlain shuh shuh ia ka jingtrei kam ka NREGA kumba la kdew da ka tnad pynroi nongkyndong jong ka sorkar pdeng, ka kabinet mynta ka sngi kala shim ia ka rai ban thaw noh ia ka “ Natural Resources Management Committee” ha ki shnong.
Haba ia dei bad ka jingpyntrei kam ia ka NREGA ha ka jylla haduh mytna ha ka jylla Meghalaya ka dang long tang hapoh ka 60% dei na kane ka daw ban pynkhlain shuh shuh kumno ban pynkiew ia kane ka jingtrei ha ki nongkyndong la shim ia kane ka rai ban thaw ia ka NRMC.
Lyngba kane yn lah ban iada ia ki tyllong um, ban pynneh ia ka khyndew, ban iada ia ka mariang bad kan dang pynkiiew shuhs huh ia ki lat jingtrei lyngba kane ka bylla shispah sngi ia kaba la tip kum ka NREGA.
