Shillong, K.Lyngkot 12: U bah Adelbert Nongrum MLA jong ka 17-Shillong North mynta ka sngi u la leit ban ai da ka dorkhas sha u Myntri Rangbah ka jylla u Cornad K Sangma halor ki san tylli ki mat kiba u la kren haduh u snem 2018 kaba u la jop ia ka MLA ilekshon bad la ai por san sngi ia u myntri rangbah ka jylla ba un ai ia ka jubab.
Haba kren ha ki lat pathai khubor ha dien bala ia kynduh ia u mytnri rangbah ka jylla ha iing sah jong u ha Oakland u bah Adelbert la ong ba lada u mytnri rangbah ka jylla um jubab hapoh ka san sngi na ka liang jong u un sa shim ia ka rai ban nym ia shim bynta ha ka jignrakhe ia ka jigndap 50 snem ka jylla Meghalaya.
Ki mat kiba u bah Adelbert u la leit ban ai sha u myntri rangah ka jylla, ka long ba ka sorkar ka dei ban peit biang ia ka bhah mang kam, u MLA ka 17-Shillong North u la kren shai ba ia ka bhah kamha ka ioh kam ioh kam dei ban neh kumba ka long mynta, hynrei dei ban peit thymmai ha kaba ia dei bad ka bhah ban leit pule sha ki kyrdan kiba sha jrong.
Ha ka jingthoh kaba la ai mynta ka sngi la buh ruh ia ka mat ban kyntiew ia ka rta wat kam wat jam jong ki samla la kumno kumno sha ka 38 snem, kane ka dei ka kam jong ka sorkar jylla kaba ka lah ban leh lada ka mon, lada ka sorkar Odisha ka lah ban leh kan eh aiu ia ka sorkar Meghalaya ban shim ia ka rai.
Kawei ka mat kaba la thoh shai ba ka sorkar ka dei ban shim ia ka rai ban don noh la ka jong ka kynhun IAS bad IPS, kubma ka long mynta ka jingdon lang bad ka Assam ka la buh jingeh ia ki IAS bad IPS ban trei kam khamtam ha ka jingiakren ban ia pynbeit khappud bad ka jylla Assam, ba la don kam ban don la ka jong ka kynhun IAS bad IPS.
Haba ia dei bad ka Them Metor u bah Adelbert u la ong ba ka sorkar ka dei ban pyndep ia ka jingkular ban pynkynriah ia ki briew kiba sah ha Them Metor da kaba but ia ki kyndon ain bad ia kiba sah beain ruh dei ban pynkynriah katkum ka ain.
Haba ia dei bad ka jingiapynbeit pud bad ka jylla Assam ka sorkar ka dei ban shim ia ka rai hapoh ka iing dorbar da kawei ka sur ba dei ban pynbeit noh ia kane ka jingiakajia pud kaba la neh mynta haduh 50 snem ka jylla, lada ka jylla ka rakhe ia ka jingdap 50 snem kam don jingmut lada ia kine ki jingdon kam kiba ka jylla ka dei ban don ym lah ban pynurlong.
