Shillong,K.Lyngkot 15: Hapdeng ka jingpyrkhing na ka daw jong kane ka jingpang Covid- 19, mynta ka sngi ka Shillong Archdiocese kala pyndep ia ka jingleh niam leh rukom ban pynkyntang Lyngdoh ia Ki San ngut Ki Dikon ia kaba la pynlong ha Iing Mane Bah Laitumkhrah ka Maria ka Nongiarap Ki Khristan.
Kane ka jingpynkyntang lyngdoh ia ki san ngut ki dikon kiba dei na ki ar tylli ki Diocese Shillong Archdiocese bad ka Nongstoin Diocese ka la long ka sngi ka ban sah jingkynmaw kaba shi junom ha ka jingim jong ki 5 ngut ki Deacon kiba la shah skhor ia ka jingkhot ka jong u Blei ban shakri ha ka bri sohwain u Trai ha kaba ki la shim ia ka jingsmai ban im sotti, ban im duk bad ban im hok kum ki Lyngdoh sha bymjukut.
Kine ki san ngut ki samla kiba kynthup ia u Deacon Barnabas Syiem na ka Umden Parish bad u Deacon Jeffree Kharkongor na Laitkor Parish kiba dei na ka jingiasyllok Salesian of Don Bosco.
U Deacon Wester David Marbaniang na Mawlai Parish bad u Deacon Robert Marwein ki dei na ka jingiasyllok Salvatorian katba u Deacon Ryngkatbor Dkhar pat u dei na ka jingiasyllok ki Phadar Trai Ri ba la tip ruh kum ki Diocesan.
Ia kine ki san ngut ki Deacon la pynkyntang Lyngdoh Sohblei da u Archbishop jong ka Jyllaniambah Shillong u Most Rev. Victor Lyngdoh ha ka jinglehniam kaba shongkun shongblei kaba la long Ingmanebah ha Laitumkhrah, Shillong ha ryngkat ka jingsakhi lang da ki bahalor jong ka Jingiasyllok Salesian, ka jingiasyllok Diocesan bad ka jingiasyllok Salvatorian.
Ha kane ka sngi ki kmie ki kpa bad ki ba haiing hasem jong kine ki san ngut ki Deacon, ki riewniam bad ki paidriewngeit kiba wan najan bad najngai ban sakhi lang ha kane ka sngi kaba kyrpang tam ha ka jingim jong kine ki san ngut ki samla.
U Phadar Ryngkat Bor Dkhar Nongladew Mawbri Parish Diocesan Priest na Ri Bhoi District Ar ngut Ki Phadar Jingiasyllok Salesian Jong u Don Bosco (SDB) U Phadar Barnabas Syiem na Umden Parish Ribhoi District U Phadar Jeffree Kharkongor SDB, Arngut na ka Jingiasyllok SDS Salvatorian U Phadar Robert Marwein SDS Pyndengrei Parish, Nongstoin Diocese U Phadar Wester David Marbaniang na Umsaw Mawjynrong, Mawlai Parish Shillong Archdiocese.
