Shillong, K.Lyngkot 20: Haba ia dei bad ka kam pynbeit hapdeng ka jylla Meghalaya bad Assam na ka liang jong ka party Congress ka sngew ba ym dei ban iaid lait na ka riti synshar kumba la kdew ha ka Para 20 jong ka khyrngit kaba hynriew jong ka riti synshar ka Ri India.
Haba jubab ia ki jingkylli haba ia dei bad kane ka kam pynbeit pud ka nongialam jong ka CLP ka Kong Ampareen kala ong ba ka jingpynbeit pud ka dei ban long katkum ka Para 20 jong ka khyrngit kaba hynriew bad kaba la kdew ha ka North Eastern Areas Reorganization Act 1971.
Ka Kong Ampareen kala ai ka jingiaroh ia kane ka jingiakren pynbeit pud kaba mynta namar ka jingiakren kala kham bniah ha kaba kila leit sha madan ban ia kynduh ia ki paidbah ban sngewthuh ia ka jingsngew jong ki briew.
Ka jingiakynduh mynta ka sngi ia u mytnri kam poh iing ka sorkar pdeng ha Delhi, da ki ar ngut ki mytnri rangbah ka long ba kin pyntip sha ka ka tnad kam poh iing ia ka jingiamynjur lang jong ki ar tylli ki jaka ia ki jaka ban ia pynbeit ha khappud hapdeng kine ki ar tylli ki jylla.
Na ka liang jong ka nongialam jong ka Party Congress kala pynpaw ba wat la ia ki jaka ba la ia pynbeit ym pat lah ban pyntip paidbah hynrei kyrmen ba kaei kaba ki rai kan long na ka bynta ka jingmyntoi jong ki paidbah kin dang ia ap ia kaei kaba mih na ka jingiakren ha kane ka bynta kaba nyngkong jong ka jingiapynbeit pud.
