Shillong, K.Lyngkot 21: Ha kane ka sngi ba ka jylla Meghalaya kala rakhe ia ka jingdap 50 snem, hynrei na ka liang jong ki seng bhalang kum ka United Hynniewtrep Movement kila pynlong ia ka jingwah lama iong ha kylleng kane ka nongbah Shillong ha kaba ki la thoh ba ki kwah ban pynbeit ia u pud u sam bad ban ioh iala ka jong ka jylla da kaba ia khlad noh bad ki paralok Garo.
Ha kane ka sngi ka seng kala pynlong ia ka jingiaid kylleng kane ka nongbah Shillong da kaba rah ia ki lama iong ban pynpaw ia ka jingsngewsih ba ka jylla kam pat ioh ia ka jingiada kaba pura bad ka seng ka dawa ban pynurlong noh ia ki kular kiba la ia soi ha ka IOA bad AA.
Hapoh jingialam u bah Louis Dohtdong President jong ka seng Hynniewtrep National Youth Movement kila pynlong ia ka jingiaid paidbah ha kylleng kane ka sor Shillong da kaba rah lama iong ban pynpaw pyrshah ba ka sorkar kam shym la lah ban pynurlong ia ka jingdawa ILP ha kane ka jylla Meghalaya.
Na ka liang jong ka seng ki nonghikai skul MSSASA hapoh ka jingialam jong u bah Aristotle Rymbai la ong ba kane ka jingiakhih kaba kila pynlong mynta ka sngi ka dei ba kane ka sorkar kam shym la lah ban pynlait ia ka tulop jong ki kaba dang sah lai bnai, kaba ar pat ka long ka jingbym pynlait ka sorkar ia ka pisa kaba T.104 klur kaba la sah mynta lai snem,
Ka jingjied ia kane ka sngi ban pynlong ia kane ka jingiakhih ka long ban pynkyndit ia ki 60 ngut ki MLA kaba kila jied sngewbha seh ba ha kum kane ka por ba ka jylla ka rakhe ia ka jingdap 50 snem ka jylla ba kin phai khmat sha ka tnad pule puthi khamtam ia ki nonghikai, kam dei tang ia ki nonghikai SSA hyrnei ia baroh ki nonghikai.
Ha Madan Malki u MLA jong ka 17th Shillong North u dang bteng ia ka jingiakhih jong u ban pyrshah namar ka sorkar kam shym la lah ban pyntrei kam ia ki saw tylli kiwei ki mat kiba dang shah ktah ktah ia ka jylla, na ki san tylli kawei ka sorkar kala shim ia ka rai ban pyntrei kam kata ka long ban pynjlan ia ka rta trei thung kam ia ki samla pule ka jylla.
Ha kane ka sngi la sam ruh ia ki khusnam sha ki samla kiba pass bha ia ki eksamin bapher bapher kiba wan na ki long iing kiba duk na kiba duk tam, ha kane ka sngi la ai khublei ruh ia ki seng bapher bapher kiba la wan synran lang ia u ha kane ka jingiakhih jong u ban dawa ia kaei kaba ka jylla ka don kam.
