Shillong, Iaiong 27: U President Seng Kmie ka Khasi Student Union u samla Lambokstarwell Marngar u la ong ba na ka liang jong ka seng ka phah ia ka khubor kaba shai sha ka sorkar jylla ba kam dei ban shu sngap katba dawa ki Harijan ba sah ha Them Iew Mawlong.
Haba kren ha ki lat pathai khubor u President ka KSU samla Lambokstarwell la ong haba peit na ka jingia kren ha pdeng ka sorkar bad ki nongialam jong ka HPC, khamtam ha ka jingialang ba dang shu dep ha ka 25 tarik mynta u bnai ka paw shai ba ka jingpdiang ban mih da kaba buh kyndon ka long kaei kaei kaba ym lah ban pdiang.
Na ka liang jong ka KSU ka kren shai kdar ba ka sorkar kam dei ban pdiang ia kane ka jingdawa jong ki, ka sorkar ka dei ban pynkynriahnoh ia ki sha ki tnad sorkar kaba ki trei, ia kano kano ka tnad sorkar ba ki trei kin ai jaka sah kumba leh lang ia baroh ki nongtrei sorkar.
Kumba ka sorkar kala dep ban shim jingkhein ba ki 342 tylli ki long iing kiba dei ki nongtrei sorkar, ka sorkar ka dei ban pynkynriah noh ia ki na katei ka jaka bad ia kiba sah beain dei ban kyndang mardor kumba la leh lem ia kiwei ruh.
Na ka liang jong ka KSU ka kynnoh ba kane ka jingbuh kyndon jong ki Harijan kiba sah ha Them Iew Mawlong ka long ba kim kwah ban mih na katei ka jaka, ki kwah ban pynibor bad ka sorkar, ia kaba ka seng kam lah ban pdiang ia ka jingbuh kyndon ban ai jaka 200 Metter sawdong ban shna iing bad ka pisa, lada ai ia ki ai lang ruh ia kiwei.
Ki Harijan kiba sha ha katei ka jaka lada kim hun ia kaei kaba ka sorkar kan ai, ladei ban leit phai noh sha la ki shnong ki thaw kaba ki wan, ha ka juh ka por kito ki kynhun kiba wan na sha bar lada ki sngew na ka bynta jong ki ialam noh ia ki bad pynthied jaka ia ki ym ha Meghalaya sha bar jong ka jylla Meghalaya.
Na ka liang jong ka KSU kam kwah ban iohi ba ka sorkar kan ia lehkai bad kane ka kam, kane kam dei ka jingdawa jong ka KSU Marwei hynrei ka dei ka jingdawa ki paidbah ba bun balang, namar katei ka jaka ka long ka ktem jong ki jingsniew ha kaba bun kila sha shoh bad shah lute kiba iaid lynti.
Ka KSU ka kwah ban iohi ba ka sorkar kan pynkynriah noh ia ki nongtrei ka sorkar na katei ka jaka, ia kaei kaba ka sorkar kan leh pat ia katei ka jaka ka KSU kam don jingtip ei ei ruh em, ka shukwah ba iohi ba ka sorkar ka dei ban pynkynriah ia ki sha kiwei ki jaka na ka bynta ka jingshong shngiang.
U General Secretary jong ka seng u samla Donal V Thabah la ong ba ka sorkar kam dei ban ruh ban ai duh ia ka jaka sha ki lada kila kut kapor treikam jong ki ki hap ban mih noh na ki jaka sah kumba leh lem ia baroh ki nongtrei sorkar namar ha dien ba kila shong thait ki hap ban mih noh.
