Shillong, Jymmang 24: U MLA ka Mawlai Konstitwensi u Bah Process T Sawkmie ha ka sngi Hatmajai ka 24 tarik u Jymmang, 2022, u la noh jingiarap ban pynshna kamra klass na ka bynta ka Grace Care Academy Secondary School, ha Mawlai Nongkwar, kumjuh ban pynmaramot ia kawei na ka kamra klass kaba la jot la pei.
U bah Sawkmie u la noh jingiarap ruh na ka bynta ban shna lynti iaid kali ha dong Nengnong B, Mawiong Umjapung. Hashuwa kane u la jurip ia ka skul Grace Care Academy kaba don ha Patarim, Nongkwar bad kumjuh ia ka lynti iaid kali ha dong Nongneng B, Mawiong Umjapung.
Ha skul la don lang ki nonghikai kong M. Sohtun, kong M. Nongkynrih bad kiwei. Ha Mawiong Umjapung la don lang u rangbah dong, bah Y. Wahlang bad ki paidbah nongshong shnong.
Ha Skul Grace Care Academy nalor ka jingkren na u MLA la ioh ruh ia ka jingkren na u Deputy rangbah shnong ka Mawlai Nongkwar, bah Wanseng Jyrwa, na ki nonghikai, M. Nongkynrih, M. Sohtun, katba ha Mawiong Umjapung pat la ioh ia ka jingkren na u rangbah dong, uba la ai khublei bad pynpaw ka jingsngewnguh ia u MLA.
