Shillong, Jylliew 03: U myntri khynnah ka sorkar pdeng u Dr. L Murugan ba dei peit ia ki kam ri jingri ha ka sngi kaba ar jong ka jingwan jurip ia ki kam pynroi ha kane ka jylla u la leit jngoh ia ka jaka song dud kaba donha Mawiong ha ka jingiadon lang ki heh sorkar na kane ka jylla.
U Myntri ka sorkar pdeng u la ia kynduh ruh ia ki nongrep kane ka jylla ban ia mir jingmut bad ki ban kylli byrthew ha kaba ia dei bad ki skhim kiba la phah na ka sorkar pdeng ban pyntrei ha kane ka jylla Meghalaya.
Ha kane ka sngi u myntri ka sorkar pdeng u la ong ba ka jylla Meghalaya ka don ka lat ban kyntiew ia ka kam ri masi lada ki nongrep ki skhim khia ban kyntiew ia ka lat kamai kajih ka jong ki bad u la ai ka jingiarap ha kaba ia dei bad ka jingpyntrei kam ia ka skhim ban pynmih dud.
U myntri u la leit jngoh ia ka jaka ri masi kaba don ha Upper Shillong ka jaka ban pynmih ia ki symbai masi kiba bha ban kyntiew ia ka kam pynmih dud ha kane ka jylla, na kane ka jaka la sam ruh ia ka dud sha ki shnong ba don sawdong jong katei ka jaka bad ha kane ka la thung ruh ia ki jingbam ban ai masi.
U Myntri u la ong ba katei ka jaka ri masi kaba don ha katei ka jaka ka long ban ialeh ban pynbha ia ki masi kiba dei ki symbai na kane ka jylla da kaba pyndon kam ia ki stad kane ka juk kaba mynta namar ka iew kala don lypa ha ka jylla dei na kane ka daw hap ban dang leh shibun ki kam kam.
U Myntri u la kyntu ia ki paidbah kiba dei ki nongrep ha kan kane ka jylla ba kim shim ia ka kabu ban kyntiew ia ka kamai kajih ka jong ki lyngba ki skhim ri jingri ka sorkar pdeng, ym tang ha kane ka kam ri masi hynrei ki sniang bad ki syiar ruh kum juh.
