Shillong, Jylliew 09: Da ka jingsngewkitkhlieh halor ki mat kiba iadei bad ka jingmyntoi jongki paitbah jongka thain bad ka South West Khasi Hills District, ka KSU South West Khasi Hills District ka la wanrah hakhmat U MLA ka thain.
Ha kane ka jingiakynduh ia u MLA ba dei ruh myntri jogn ka sorkar jylla u bah Reniktone L Tongkhar ka KSU kala dawa ban plie bad mang ban thung ia ki kam hapoh ka Hospital kaba 100 jingthiah ha Mawkyrwat. Ka koit ka khiah ka dei kawei ka mat kaba hakhmat tam jongka seng bad ngi sngew ba ka dei ruh kawei na ki mat kaba donkam tam jongki paitbah.
Kum ka seng ngi dap daka jingsngewdiaw shikatdei eh hadien ba ngi la iohi ba ka don ka jingdkoh ha kane ka bynta khamtam hapoh jongka Mawkyrwat CHC ha kaba ngi la lap ba ka jingdon ki doctors bad ki nongtrei haka koit ka khiah ki la duna palat bad ka jingduna ban mang nongtrei hapoh kane ka CHC ka la buh jingeh bad kim lah shuh hi ruh ban ai iaka jingsumar ba paka katba kum ka jingdonkam jongka por.
Shuh shuh na ka liang jongka seng ngi pynpaw iaka jingsngewdiaw namar ba watla la dep buh mawnongrim ( Foundation Stone) ia ka 100 bedded CHC ha Mawkyrwat naduh u bnai May, 2011 hynrei haduh mynta watla ka la tam iaka 11 snem hynrei ym shym la lah ban plie bad mang( sanction ) iaki post katba kum ba ka dei ban long.
Kumta ka seng, lyngba kane ka jingthoh, ka kyrpad iaphi ba phin sngewbha ban tuklar lem bad ban shimkhia ruh ban plie noh iaka Mawkyrwat 100 bedded CHC , ban mang noh iaki posts kumba ka dei ban don hapoh ka CHC.
Ka KSU ka daw ban pynbiang noh ia baroh ki tiar ki tar ba donkam hapoh kane ka CHC bad ia kiwei kiwei ki jingdonkam khnang ba kan nym buh jingeh iaki paitbah jongka thain khamtam ia u kup shiliang sem shiliang. Ngi khmih lynti kum ka seng ba phin pynurlong noh kham kloi halor kane ka mat kaba hakhmat eh jong u paitbah.
Ka seng ka sngewdei ban pynkynmaw bad wad jingtip naphi kum u MLA jongka Mawkyrwat Constituency bad kum u Minister jongka P.H.E Department halor ka Mawkyrwat Greater Water Supply Scheme kaba dei kawei naki project jongki shnong ba marjan bad ka Mawkyrwat ia kaba ki paitbah ki dang ap khmih lynti haduh mynta.
Kane ka project ka la paw ruh haki lad pathai khubor hynrei haduh mynta kum ka seng ngim pat iohi ba la sdang ban pyntrei bad pyniaid shakhmat ia kane ka project. Kumta , ka seng haba iadei bad kane ka mat ka sngewdei ban kyrpad iaphi ba phin sngewbha ban shimkhia khnang ban ioh ban pynurlong noh iaka jingangnud jongki paitbah jongka thain Mawkyrwat.
Ka surok naduh Tynnai haduh Nongnam ka dei ka surok kaba long kum u budlum iaki paitbah jongki 8 tylli ki shnong kata iaka shnong Mawrap, Jerlang, Mawsain, Mawtangden, Mawkhyrwang, Nongnam, Mawbri bad Lumpyngngad. Katkum ka jingtip ba ka seng ka la ioh , Ia kane ka surok la mang naka scheme Pradhan Mantri Gram Sadak Yojana bad haka jingjngai kaba long 19.303 kms.
Ban pyntrei ia kane ka surok la aiti haka M/s Marwein Construction bad katkum ki kot ki sla la pyni ba la sdang ia kane ka jingtrei naduh u bnai January , 2018 bad dei ban pyndep pat ha u bnai June 2019 bad ban maramot pat ka dei ban long haduh u bnai June 2024 hynrei kumba long mynta , naka liang u Contractor um shym la lah ban pyntrei bad ngi lah ban ong ba kam don ka jingshimkhia naka liang jong u.
Ka seng namar kata ka sngewdei ban kyrpad ba phin sngewbha ban shimkhia mardor bad ban tuklar namar ngi iohi ba ka don ka jinglehsting naka liang u Contractor halor kane ka bynta. Ka jinglehsting u Contractor ka la pynlong iaki paitbah jong kine ki 8 tylli ki shnong ba kin iai mad iaki jingeh haka iaid ka ieng bad khamtam eh haba ki don ban pynpoi iaki mar rep jongki sha ki iew ki hat.
Ka seng ka pynpaw iaka jingsngewkhia ban lap ba ka don ka jingbymbiang haka jaka ban pynlang bad ka jaka theh iaki niut kiba mih naka iew Mawkyrwat. Kumba ka la paw haki lad pathai khubor la iohi ba ka la long ka ba pynisaitmet shikatdei eh iaka iew bad kane ngi i ba kan ktah iaka koit ka khiah jongki paitbah bad ruh kan ktah ruh ia ka tyllong umbam umdih lada ym lah ban shimkhia haka por kaba biang.
Kumba long mynta, iaki niut bad ki jaboh ba mih na iew Mawkyrwat la shu pynlang bad bret katba lap ba shem mamar ym shym pat la don ka jaka theh niut ba paka ha ka thain.
Kumta, haba iadei bad kane ka mat ka seng ka sngewdei ban kyrpad iaphi ba phin sngewbha ban shimkhia ban wad ki lad ki lynti ban pynkhuid , nangta ban wanrah ruh iaka mang tyngka ba biang khnang ban wad iaka jaka bad ban shna noh iaka jaka theh niut kaba biang naka bynta ka jingbit jingbiang jongki paitbah nongshong shnong.
Haba iadei bad ki mat ba la kdew haneng , ka seng ka khmih lynti ba phin shimkhia mardor bad ban pynurlong iaki jingangnud kiba ki paitbah ki khmih lynti baroh shikatta. Iaka jinglong ba la kloi ban sngap lem iaki mat jong u paitbah, ka seng kan da sngewnguh bad sngewburom shi katdei eh.
