Shillong, Jylliew 10: Kum shi bynta ka jingrakhe ia ka Azadi Ka AmritMahotsav ka tnat Investment bad Public Asset Management (DIPAM) ka la pynlong ia ka jingialang halor ka phang ‘ka jingpynmih pisa lyngba ki iew’.
kane ka long kum ka prokram kyrpang ha 75 tylli ki nongbah ha kylleng ka ri mynta ka sngi. Ha Meghalaya, la pynlong ia kane ka jingialang ha IIM Shillong ha Umsawliha kaba ka IIM Shillong ka la iatrei lang bad ka DIPAM ban pynsaphriang jingtip.
Ka Myntri tnat Finance bad Corporate Affairs jong ka Sorkar Pdeng, ka Nirmala Sitharaman ka la iashim bynta lang ha kane ka jingialang na Indian Institute of Science (IISc), Bengaluru bad u Myntri Khynnah ka tnat Finance jong ka Sorkar Pdeng, u Dr Bhagwat Kishanrao Karadu la iashim bynta lang ha kane ka jingialang na Vigywan Bhawan, New Delhi.
U kongsan jong kane ka jingialang ha IIM Shillong u la long u Prof. D.P. Goyal, Director IIM Shillong. Ha ka jingkren jong ka, ka NirmalaSitharamanka la ong ba ka jinglong jingman jong ka kam ban peit ia ki jingdon jingem paidbah ka la pher katba dang iaid ka por bad hadien ka mang tyngka 2021.
Ka la don ka jingkylla kaba khraw, ha kaba lait noh na ki kam kiba kyrpang, ka jingdon bynta ka Sorkar ha kiwei kiwei ki kam ka la kham duna.“Ki samla nongseng kam lajong kidei kiba wanrah shibun ki jingmyntoi ha ka iew. Lada ki shimkhia ban iathuhkaei kaba lah ban leh kham bha ha ki kompani, ka jingiatreilang ki kynhun bad ki riew shimet bad ka sorkar kan wanrah ka jingbha na ka bynta ka ri,” ka la bynrap.
Ka la ong bun ki Start-up kiba kwah ban trei, kiba don bynta bad kiba iatreilang bad ka ISRO ha ki kam kiba iadei bad ka haw haw. “Namar kane, wat ha ki kam kiba iadei bad ka haw haw, ngi la iohi shibun ki startup kiba la wan ha ka kam bad kiba kwah ban iadon bynta lang,”.
Ka la ong da kaba bynrap ba baroh ki lah ban iohi mynta ia ka jingiatreilang ki briew bad ki kynhun shimet bad ka Sorkar ban bei tyngka ha ki kam kiba iadei bad ka haw haw bad ka teknoloji. Ki kompani ba la shah weng ka jingbei tyngka mynta ki trei kham bha bad ki ai jingiohnong shuh shuh ia kito kiba pyniaid ia ki kam, ka la ong.
Ka la ong ruh ba ka rukom weng ia ka jingbei tyngka katkum ka rukom treikam mynta kam dei ban khang ia kanokano ka kam hynrei ban pynkhlain shuh shuh ia ka khnang ba kan lah ban trei kham bha.
U Dr.BhagwatKishanraoKaradu la kren shaphang ka jingweng noh ia ka jingbei tyngka ka sorkar bad u la ong ba kane ka la long kum ka jingiakhihpaidbah mynta namar ki bun ki briew mynta kiba kwah ban iashim bynta ha kane.
U Prof. D.P. Goyalu la kren shaphang ka jingpynmihia ka spah bad ki rukom leh ia kane. “Ka nongrim ba kongsan jong ka jingpynmihspah ka ong ba katba dang heh ka jingma, katta dang bun ka jingiohnong,” u la ong.Ha kaba iadei bad ka jingbei tyngka bad ka jingkynshew pisa ha ki iew.
U la ai jingmut ba dei ban don ka jingtrei automatic ha ki kambei tyngka da kaba peitthuh bad sngewthuh ia ka iew, ka jingsdang ia ki jingbei tyngka bad ki jingkynshew pisa kiba kloi kaban wanrah ia ka bynta kaba kham heh ha ka roi ka par jong ka ri ha ryngkat ka jingkyntiew ia ka ioh ka kot jong ki briew shimet.
Hadien ka jingialang plie, la pynbud da ka jingialang ba la iashim bynta lang ki riewshemphang kiba kynthup ki nonghikai, kito kiba la pyntbit ha ki kam pisa, kito kiba la pyntbit ha ki kam bapher bapher, kito kiba trei ha ki bank bad kiwei kiwei. Ha kane ka jingialang ka la don ruh ka jingiamir jingmut halor ki phang bapher bapher kum:
Ka jingiaid lynti jong ka Stock Market ka India ha ki 75 snem bad ki lad nangneshakhmat, ka jingpynsuhthied shuh shuh ia ki iew pisa, ka jingpynpoi ia ki kam pisa sha ki jaka nongkyndong bad ka jingpynmih pisa, ka jingai jinghikai ha ki kam pisa.
Ka lynti sha ka bha ka miat bad ki longkmie kum ki nongbei tyngka, ka jingtip shaphang ki kam pisa bad ka jingbei tyngka shimet ha ki iew pisa, ki jingai jingshakri digital jong ki bank bad ki lad ha ki Stock Market ka India (ka jingpyniasoh bad ka teknoloji), ka jingpynmih pisa na ka bynta ki nongbei tyngka shimet.
Kito kiba la ai jingkren ha kane ka bynta jong ka prokram ki long u Prof. SharadNath Bhattacharya, Faculty IIM Shillong, kaTsheringDiki, Chairman ka Meghalaya Rural Bank, kaSnehaKochar, Investment Advisor, ka Prof. Ambika Prasad Pati, Dean, SEMIS, North Eastern Hill University, uBiswajitSaha, Govt bad Bank Relationship National Payments Corporation of India, uTarif UL Ameen, Senior Vice President, UTI Mutual Fund.
U Joy Dey, SMC Global Securities Ltd. u la ai jingkren pdiang sngewbha ha kaba u la kren shaphang ka jingiaid lynti ka iew Stock Market ha India ha ki 75 snem bad u K. Roy, Lead District Manager, East Khasi Hills, Shillong u la ai khubleipynkut ha kane ka sngi.
Ki nonghikai, ki ophisar, ki nongtrei bad ki samla pule ka IIM Shillong, director ka NIFT Shillong, principal ka IIHM bad kiwei kiwei ki jaka kam iadon kti bad ki kam pule bad ki kam pisa ki la wan iashim bynta lang ha kane ka prokram ha ryngkat kiwei kiwei.
