Shillong, Jylliew 13: Hadien ka jingsyier jong ka imlang sahlang na ka ba la tyllep ka khlam la katta snem, la wan phai biang ka suk ka saiñ bad kiei kiei baroh ki la sdang ban long kumba ju long.
Kum ka jingpynkhreh na ka bynta ka Dorbar Kur ha Sohryngkham, ka Seng Kur Warjri ka la pynskhem ia ki shnat treikam ha ki ar tylli ki shnong, ka Pyndeng Nongbri bad ka Manai.
Ha ka 28 tarik Jymmang la pdiang bad pynskhem ia ki khlieh nongkitkam ha Pyndeng Nongbri bad ha ka 10 tarik Jylliew pat la pdiang bad pynskhem ia ki khlieh nongkitkam ha Manai.
Na ka shnat Pyndeng Nongbri, la jied ia u Bah Marbelstar Warjri kum u Khliehduh bad Bah Pynshailang Warjri kum u Saiñpyniar; ki symbud khliehduh ki long u Bah Boksing Warjri bad Bah Tairos Warjri, u Symbud Saiñpyniar la jied ia u Bah Burnet Warjri.
Kiwei kiwei ki nongkitkam ki long ka Kong Martidoris Warjri (Finance Secretary), Kong Dady Warjri, Bah Maktursing Warjri, Bah Davidunderson Warjri Bah Pailen Warjri bad Bah Wantar Warjri nongai buid, ha ryngkat bad arphew ar ngut ki dkhot. Ha kane ka sngi la pynkup burom ruh ia khyndai ngut ki samla ki ba ioh ka namjop banyngkong ha ka SSLC bad HSSLC (Examination) 2021.
Ha ka 10 tarik Jylliew, 2022 la pdiang bad pynskhem ia ki nongkitkam jong ka shnat Manai bad la jied ia u Bah Korman Warjri kum u Khliehduh (President) bad Bah Ribesstar Warjri kum u Saiñpyniar (Secretary); u symbud khliehduh u long u Bah Phlarsing Warjri, u Symbud Saiñpyniar la jied ia u Bah Habanjop Warjri.
Kiwei kiwei ki nongkitkam ki long ka Kong Mobina Warjri (Finance Secretary), Kong Bitaris Warjri (treasurer), Bah Koting Warjri bad Bah Phesting Warjri (advisers) Bah Bankitbok Warjri bad Bah Khraw Warjri (auditors) kynthup bad arphew san ngut kiwei pat ki dkhot (Executive Committee).
Ha kane ka sngi la pynkup burom ia ki riewtymmen longkmie bad longkñi jong ka kur Warjri na Manai bad la sam ruh da ki jingai sngewbha na ka seng kur shnat Manai.
Ha baroh ar kitei ki dorbar kur shnat la kren kyntu kynpham da ki rangbahkur naduh u Bah George Warjri (Acting President), Bah Kyrsoibor Warjri (Vice President), Bah Barkos Warjri, Bah Sunshine Warjri (General Secretary) bad kiwei kiwei ki rangbah na la ki shnat treikam jong ka shnong Pyndeng Nongbri bad Manai.
Ha baroh ar tylli ki shnong la kren pynkut da ki khliehduh nongialam Bah Marbelstar Warjri ha Pyndeng Nongbri bad Bah Korman Warjri ha Manai ba la bud artat da ka jingrwai paidbah halor ka Seng Kur Warjri ba la lam da u Bah Sunshine Warjri, Saiñpyniar na ka seng kmie.
