Shillong, Jylliew 19: Ka seng HYC na ka shnong Shella kala phah da ka jingthoh sha ka ophis jong u Sub-Divisional Officer (Civil) Sohra ha kaba ka seng kala kyrpad ban phah tohkit ia ka jingshah pynjulor hapoh ka shnong na ka daw jong ka jinglynshop ka mariang.
Ha ka shithi ka HYC na Shella ki pynpaw ia ka jingsngew bynniaw bad sngewsih kaba jur halor ka jingshah pynjulor jong ki jingdon jingem naduh ki lynti syngkien, ki jyngkieng, ki surok, ki kynroh bad kiwei kiwei ha kane ka shi taiew tam jong ka jinghap slap kaba jur kaba lah wanrah ia ka jingshlei um kaba jur bha hapoh ka Shnong Shella.
Ka Umsaw bad ka jingshlei jong ka Wah Shella ka lah wanrah ka jingjot ia ki surok kali, ki Kynroh iada ia ka shnong bad ruh ia ki jyngkieng kiba don hapoh shnong Shella kiba lah pyntrei da ki Tnat bapher bapher jong ka Sorkar.
Khlem da lah ruh khlem da pynpaw ia ka jingshah ktah kaba jur jong kawei na ki Dong kiba hap hapoh ka Shnong Shella kata ka Kher Pyrkan ha kaba ka umsaw ka lah rah noh ia ka kynroh kaba lah shna khnang ban iada ia kane ka Dong bad kumjuh ruh ia ka Surok kali kaba lah shna lyngba ka jingbei pisa na ka SPV Society nalor kiwei kiwei ki jingshna jong ki paidbah.
Ka jingjulor jong kine ki artylli ki kam ka lah kot da ki Klur tyngka bad ruh ka jingpynjulor ia katei ka Kynroh kaba lah shna khnang ban iada ia ka Kher Pyrkan ka lah buh jingma namar ba ka um ka lah poi haduh ki Iing shong bad lada ym leh ei ei kloi ka lah ban wanrah ia ki jingjia ba sngewsih bad ki jingjulor ba kham bun ia ki paidbah ba shong ba sah ha kane ka Dong Pyrkan.
Ym dei tang ia ka Dong Pyrkan hynrei ki lah don ki jingshah pynjulor ha kiba bun ki bynta bad ki jaka hapoh jong ka Shnong Shella bad khnang ban lap bad sngewthuh shai ia ki jingshah pynjulor, ka HYC ka sngew ba donkam ban leh noh kloi ia ka jingtohkit bad shna ia ka kaiphod kaba thikna khnang ba ki bor ba dei peit kin ioh ban shim ia ki lad ban shna bad maramot ia kitei ki jingjulor bad kham kloi.
Kane kan long khmatam eh ban thaw ia ki lad jingiaida ia ki jingdon jingem bad ki mynsiem briew jong ki nongshong shnong kiba shong ba sah ha shi lynter ka Wah Shella bad kumjuh ruh ha ka Shnong Shella hi baroh kawei. Ka HYC ka kyrmen ba ka ophis kan leh ia kaba don kam, ia ka shithi la soi da u bah Seiborlang Diengdoh General Secretary ka seng.
