Shillong, Naitung 03: Ka Ri-Bhoi Dorbar ka ban sa kynjoh pura sha ka rta ba 60 ha u snem 2025, bad mynta ka dang jam ia u mawmer ba 57 snem (1965-2022), kan dang khlaiñ shuh shuh ka jingshakri jong ka hadien ba 11 ngut ki nongialam ba la rangbah bad kiba la shongthait noh na ka Ri-Bhoi Youth Federation (RBYF) ki la pyniasoh noh ialade hapoh jong ka.
Ka jingpyniasoh jong kitei ki nongialam barim ka RBYF ki long kum ka jingburom markylliang, namar dei ka Ri-Bhoi Dorbar kaba la suit la shor nyngkong eh ia ka RBYF ha ki snem 1979, bad lah ban ong ba ka Ri-Bhoi Dorbar ka long ka kmie ia ka RBYF haduh kine ki sngi.
Kitei ki 11 ngut ki nongialam barim ka RBYF la pdiang kum ki dkhot ba pura ka Ri-Bhoi Dorbar da u Bah RB Shadap, President ryngkat bad ka jingsakhi ki nongialam ka Ri-Bhoi Dorbar bad RBYF, khnangba kin dang pyntyllun shuh shuh ia ka jingshakri ha ki kam pynroi bad kiwei ki kam ha ka imlang sahlang.
Ki nongialam ka RBYF kiba la shong thiat kiba la ia don lang ha ka Ri Bhoi Dorbar ban ia tynrong ia ka kam ki long u Bah FM Mawphniang, Bah Doris Suleiñ, Bah Moris Lyngdoh, Bah PM Namsaw, Bah Rocky Kylla, Bah Dipshon Ryntathiang, Bah CGR Syngkli, Bah Kerbhalang Shylla, Bah Friday Jalong, Bah Dilip Kharkrang bad Bah Ronus Maiong.
