Exif_JPEG_420
Shillong, Naitung 14:Ka seng Confederation of Ri Bhoi People (CoRP) hynne ka sngi hapoh ka jingialam u Bah Bandary Ryntathiang President ryngkat ka jingdonlang u Roland Lyngdoh President Nongpoh Circle, bah Shainingstar na Central Zone bad kiwei ki dkhot ki la leit jurip ia ka jingkieng Dwarksuid ha surok bah Shillong Bypass.
Kane ka jingleit jurip ka long halor ka jinglong jingman ka jingkieng kaba la orpait bad synjor na ka jingiaid ki trok kit palat pud hadien ba ka jingtwa ka jingkieng nar ne Belly Brigde ba la shna da ka Border Road Organisation (BRO) ka la pra noh tang hadien shisnem.
Haba kren bad ki nongthoh khubor u President ka CoRP bah Bandary Rantathiang ula ong ha ka jingjurip na ka liang ka seng ka lap ba katei ka jingkieng Dwarksuid ka dei jingkieng ba rim naduh ka NEC Road bad la shu pynbha da ka NHAI ha ka por ba shna ia ka Shillong Bypass.
Kane ka jingkieng mynta bun ki jaka ki la orpait bad la lap ba la shu syrdep da ka dewbilat ban pyndam ia ki jaka orpait bad ka long ka jingma ia ki paidbah nongleit nongwan namar ym lah ban tip ka lah ban twa ha kano kano ka por.
“Ka seng kan sa wad jingtip lyngba ka hop wad jingtip (RTI) balei ba ka NHAI kam shna ia ka jingthymmai ha ka por ba shna ia ka surok Bypass bad balei ka jingkieng Belley Brigde ba T.3 klur ba shna ka BRO ka twa tang hadien khyndiat bnai katba ha ka por ba paw katei jingkieng nar kan shan kumba 10 snem” ula bynrap.
U Bah Bandary u la iathuh hynne ka sngi ki la bat katto katne ki trok ba iaid na katei ka jingkieng ba wan na Assam bad Jaintia hills bad ki driver ki iathuh ba ki kit 20 haduh 40 tone bad ym don satia kiba peit wat la ki bor district ki la mana bad sieh da ka sign board bay m shah ban iaid ia ki kali ba kit palat 10 tone naduh ki bnai ba la dep.
Hynrei kaba lyngngoh ki trok ba kit haduh 40 tone ki dang iaid beit haduh mynta bad kane ka jingleh ka sorkar ka pynkulmar ia ki paidbah nongleit nongwan.
Kumta ula kyntu ia ka sorkar jylla bad ki bor district ban peit halor kane khnang ba kan ym wanrah ki jingjia ba sngewsih ia ki paidbah bad lada la shah ban iaid ki kali palat 10 tone ki bor district ki dei ban weng noh mardor ia katei ka jingthoh ba mana ban kit palat 10 tone namar ka lah ban wanrah pynban ka jingkulmar ne sngewthuh bakla ia ki paidbah ka thain naba ki trok ba kit palat palat 10 haduh 40 ki iaid man ka sngi.
U Bah Bandary ula kyntu ia ki bor pyniaid district bad ka sorkar jylla ba ia mynta shipor kim dei ban khang noh syndon ban iaid ki kali ba kit palat paud, katba ym pat lah ban pyndep ia ka jingkieng ba dang shna thymmai namar lada katei ka jingkieng ka twa noh kan ktah ia ki paidbah ka thain Ri Bhoi sepngi bad ka jylla baroh kawei.
Ula ong na ka liang ka seng shen ka sa leit ban kynduh ia ki bor district ban iakren halor katei ka mat ban lait na ki jingjia ba sngewsih.
Haba kylli na ki pulit kiba ap ha katei ka jingkieng, ki la pynpaw ba kim lah leh eiei ia ki kali ba kit palat pud namar ka shong ha ki bor bahalor bad ka kam jong ki long ban peit ia ka jingiaid beit ki kali ban lait na ka jingsah kut ki kali.
