New Delhi, Naiur 11: Ka jingap ia ka jingwan biang jong ki khla cheetah ka la sdang bad ka India ka ap khmih lynti ban pdiang biang ia ki mrad khlaw kiba stet tam ha ka pyrthei, kiba ju kyrhuh ha jan baroh ki khlaw jong ka ri mynshuwa, lait noh ha ki thain lum bad ki khappud duriaw. Ha ka 7 tarik u Nailur, ki cheetah ki la wanphai biang sha India. Shen ki cheetah kin iaid shane shatai ha Kuno National Park ha Madhya Pradesh.
Ka jingduh jait ki cheetah na India ka dei namar ki daw kiba bun kiba kynthup ruh ia ka jingkem, jingpyniap khlem pud ia kine ki mrad, ka jingpynkylla ia ki jaka sah jong ki bad ka jingduna ki mrad ba ki ju bam. Baroh kine ki dei namar ka jingleh jong ki briew bad ki pyni ia ka jingthombor u briew ia ka pyrthei.
Ka jingwanrah biang ia ki cheetah ha ki jaka khlaw ka long ka sienjam ban pynbeit ia ki jingbakla bad ban pyndep ia la ka kamram jong ngi na ka bynta ka Mission LiFE, ka jingkyntu ba u Myntri Rangbah Duh, u Narendra Modi u la ai sha ka pyrthei.
Ka Mission LIFE ka thmu ban don ka pyrthei kaba pdiang lut ia baroh, ha kaba ka jingkhwan spah jong ki briew kam ktah ia ka jingim jong ki mrad bad ki jingthung ha kaba ki briew ki im lang bad ki jingthung, ki mrad.
Ka rukom wanrah ka roi ka par ha ka thain sepngi ka la ialam sha ka jingmut ba ki briew ki long kiba khraw tam bad lyngba ka jingpynkupbor kaba wan na ka teknoloji, kine ki ‘bakhraw’ ki lah ban pyndep ia ki thong ba ki buh. Haba la pyntreikam ia kane ka rukom pyrkhat, ki briew ki la sdang ban duh watla ki la sngew shipor ba ki iohnong.
Kane ka rukom pyrkhat ka la buh ha ka jingma ia ki jait mrad, jait jingthung bad ia ka pyrthei baroh kawei. Ha India, naduh ki por mynshuwa, ngi ngeit ba Ka mariang ka iada lada ka ioh jingiada. Ka ri ka la duh ia tang uwei u jait mrad khlaw ba heh naduh ba ngi la ioh ia ka jinglaitluid jong ka ri.
Ngi la lah ban pynneh ia ki jait mrad, jait jingthung bad ki jaka ba kine ki don watla ki dei kiba don ha ka jingma. Kine ki kynthup ia ki khla, ki sing, ki hati, ki gharial bad ki kyndat watla ngi dei kiba heh paid bad watla ngi don ki jingdonkam na ka bynta ka roi ka par.
Lyngba ka Project Tiger, Project Lion bad Project Elephant, ha kine ki snem ba la dep, ka India ka la lah ban pynbun biang ia ka jingdon kine ki mrad kiba don ka bynta kaba khraw ha ka mariang.
Katba ki khla ki la long kum ki dak jong ki kam khlaw, ki cheetah kin long kumjuh ia ki jaka khlaw ba madan, ki jaka mih phlang. Ka jingwanrah biang ia ki cheetah ka dei ka jingpyrshang kaba khraw ba ngin don ia ka pyrthei kaba lah ban iaineh namar kane ka jingwanrah biang ia ki ka wanrah biang ia ka jingryntih ha ka mariang kumba ju long ha ki por mynshuwa kane ka ktah ia ka jingpynbha biang ia ki jaka sah jong ki mrad bad ka jingpynneh ia ki jait mrad ba kine ki jait khla ki ju bam.
Ka dei namar jong ki cheetah ba kiwei kiwei ki mrad kum ki skei ki hap ban kylla ka jinglong sha ka jinglah ban mareh stet. Ka jingwanphai jong ki cheetah kan pynthikna ia ka jingiada ia ki mrad ba ki ju bam kiba kynthup ia ki mrad kiba don ha ka jingma ban duh jait noh. Kan ialam ruh sha ka jingtyngkai ia ki jaka khlaw bad ki jaka mih phlang kiba don ha kane kajuh ka jingma.
Ka project cheetah kan wanrah ia ki jingdon jingem ban pynthymmai biang ia ki jaka sah jong ki ba shah ieh bein bad kane kan pynneh ia ka jingbun ki jait mrad, jait jingthung, kane pat kan iarap ha ka jingdon ki jaka khlaw kiba kjit ia ka carbon. Kane kan iarap ruh ia ki briew kiba sah ha kine ki thain lyngba ka jingkiew ki kam jngoh kai ka ban wanrah ia ki lad kamai jakpoh.
Ka pyrthei baroh kawei mynta ka sngewthuh ia ka jingdonkam ban pynneh ia ki jait mrad ba bam doh bad ki jaka sah jong ki. Ka jingwanrah biang ia ki mrad ka dei ka kam ba ngi iohi ha kylleng ka pyrthei ban tehlakam ia ka jingduna jong kine ki jait mrad.
Katba ka India ka iaid shaphrang ban pyndep ia la ka kamram ban wanrah ia ka lawei kaba lah ban iaineh kum ka nongsumar ia ka pyrthei na ka bynta ki khun ki kti jong ngi, ka la jied ban wanrah biang ia ki cheetah ban pynthymmai biang ia ki jaka sah jong kine ki mrad lyngba ka jingwanphai jong kine ki mrad.
Katba kane ka jingwanrah biang ka dang jia ha Kuno, hadien ba la sdang roi ki cheetah, ngi lah ban pyrkhat ban wanrah biang ia ki ha kiwei kiwei ki jylla kum ka Gujarat, Rajasthan, Karnataka bad Andhra Pradesh. Kane kan iarap ban wanrah biang ia ka jinglong jong ka India ba ngi la duh ha ryngkat ka jingwanrah biang ia kiwei kiwei ki jait jingim bad ki jaka sah, jaka mih jong ki.
