Shillong, Risaw 06: Ka Seng ka pynrem jur ia ka jingleh donbor bad riewkhlaw ki Pulit Meghalaya ban pyndonkam da ki Tiar Pynsat khmat (Tear Gas) ia ki Nonghikai hapoh ka lama jong ka Meghalaya Government Contractual Teachers’ Association (MGLPCTA) kiba lah pynlong ia ka jingiakhih ba jai jai ban tur sha Secretariat ha ryngkat ki khun ki kti ki jong ki hadien ba ka Sorkar kam shym lah pynsngap ia ka jingdawa ka jong ki.
Kane ka jingleh jong ki pulit ban siat da kitei ki Tear Gas sha kine ki Nonghikai ba kynthup ia ki nonghikai kynthei bad ki khun rit ki jong ki kaba lah wanrah ruh ka jingpynsaw ia ki katto katne ki nonghikai, ka long kaei kaei ka ba ngim lah ban pdiang.
Hato kitei ki Nonghikai lem bad ki khun ki jong ki kidei ki Nongleh beain? Hato kidei ki dkhot jong kano kano ka kynhun ba lah khein beain da ka Sorkar? Hato ki rah ia kino kino ki tiar pynmynsaw lane ki iakhih da kano kano ka jingmut kaba long beain ha kaba lah pynlong ia ki pulit ban siat tear gas ia ki?
Ha ka jingiohi ka jong ngi lyngba ki video kiba paw, ngi khlem iohi ba kine ki Nonghikai lane ki khun ki kti ki jong ki ba kin rah kino kino ki tiar pynmynsaw ne pyni kino kino ki dak ba kin leh ia ki kam beain.
Haba kumta, ka shong hok mo ia ki pulit ban pyndonkam ia ka bor ka jong ki shaba palat pud? Kumno kim pyrkhat ba ha kane ka jingiakhih ba jai jai ki don ruh ki khyllung khynnah bad lyngba katei ka jingleh ki pulit ka lah pynban ban buh jingma ia ka jingim ne pynmynsaw ia kine ki khyllung khynnah.
Mano ban shim jingkitkhlieh lada jia kino kino ki jingjia ba sngewsih ia ki Khyllung khynnah? Balei ba ki pulit ki hap ban shim ia kaba kum kane ka sienjam, ka long ka jingkylli kaba ngi kum ki paidbah nongshong shnong ka Jylla ngi hap ban tip bad sngewthuh?
Ka HYC ka dawa ba ka Sorkar kadei ban thung ia ka kynhun tohkit ban lap ia ka jingshisha halor ka jingjia mynta ka sngi bad ban pynshitom ia ki pulit lane ia ki majistor kiba lah aibor ban siat tear gas sha ki nonghikai bad ki khun ki kti ki jongki khnang ba kum kine ki jingjia kin nym jia shuh nangne shakhmat.
Ka HYC ka dawa ba ka Sorkar u Conrad Sangma ka dei ban shim ia ka jingkitkhlieh ban pynshitom ia ki Pulit kiba leh tam pud bad pyndonkam palat pud ia ka bor ka jong ki da kaba siat tear gas ia ki nonghikai bad ki khun ki kti ki jong ki ha khmat Secretariat mynta ka sngi.
Ka seng ka kyrpad ruh ia ka Meghalaya High Court Badonburom bad ia ka Meghalaya State Human Rights Commission ba kan shim kam da lade hi ia kane ka jingjia bad ba kan tohkit bad pynshitom ia ki pulit bad Majistor kiba donkti ha kane ka jingpyndonkam bakla bad palat pud ia ka bor ka jong ki kba lah wanrah ka jingmynsaw ia ki Nonghikai bad buh jingma ia kiwei pat. La ong u bah Roy Kupar Synrem General secretary ka HYC.
