Shillong, Risaw 09: Ka shnong Sawlad bad ka shnong Nongrilong ki dei ki lai tylli ki shnong kiba dang sah dien ha baroh ki liang, khamtam ha ka liang ka surok kaba dei ka bud lum ka ioh ka kot jong ki paidbah.
Kitei ki lai tylli ki shnong ki hap hapoh ka Mawthadraisan Assembly Constituency, kaba la mih khmat da u bah Brolding Nongsiej ha kine ki 10 snem mynta ha dien ba la wanrah ia ka jingkylli ha ki Assembly Constituency, mynshuwa ki hap hapoh jong ka Mairang Konstitwensi.
Ka surok ban leit sha kitei ki shnong na Kynrud kaba la lah ban pynioh ha ka por jinglong MLA u bah Boldness L Nongum na ka skhim PMGSY ka long haduh ka wah Uming 6 km, katba na katei ka jaka sha shnong kila tieh na ka jingtrei MGREGA ha ka jinglut kaba T.4.85 lak tyngka lyngba ka Mairang Block ha u snem 2020.
U samla Skrol Rani haba kren ha ki lat pathai khubor kiba la leit sha katei ka shnong la ong ba kum uwei na ki samla ka thain ha ka kyrteng jong ki paidbah nongshong u kwah ban iohi ba ka sorkar kan leh ei ie na ka bynta katei ka thain kham tam ha ka liang ka surok kaba la ktah bha ia ki paidbah ha ka leit ka wan khatam ia kiba pang ba shitom.
La pynkynmaw ba dei ha ka jinglong MLA u bah Boldness L Nongum ha ka por ba dang hap hapoh ka Mairang Konstituency la lah ban pynioh ia ka surok PMGSY na Kynrud sha duh wah Uming, katba na kane ka jaka sha duh shnong Sawlad, ka surok kaba la shu pyntih na ka skhim MGREGA
U Samla Skrol Rani la ong ba kyntu ia ka sorkar ruh ban pynbha ia ka surok na Kynrud sha Nongkhlaw kane ka surok ha hap ha kin ar tylli konsitwensi, ka Kynrud, Nongsohma ka hap hapoh jong ka Mawthadraishan bad ka Mawkarah ha hap hapoh jong ka Mairang Konstitwensi kane ka surok ruh kala sniew bha.
Ki nongshong shnong kiba don ha kitei ka thain Sawlad, Patharshipaih bad ka Nongrilong ki dei ki nngrep hynrei namar ka jingbym don ka surok kala buh ia ki ha ka jingeh kaba khraw ban pynkit ia ki marrep.
Kaba kham shem junjar shuh shuh ia kitei ki shnong ka long ha ka por slap, lada ka slap ki paidbah kim lah ban kam na shiliang sha shiliang ka wah Uming namar kam don wat tang ka jingkieng iaid kjat, halor kane ka kwah. Ki paidbah kitei ki shnong ki hap ban sah meit ha shiteng lynti lada dei ha ka por slap lada kim lah ban kam ia ka wah.
Ka jingangnud ki paidbah ka long lada u MLA u lah ban pynshna tang ia ka jngkieng doi doi ban iaid kjat ruh ba kin lah ban leit ban wan ha ka por lyiur ban leit na ka sah miet shiteng lynti ha ka por lyiur katba ym pat ioh ia ka surok.
