Shillong, Risaw 12: Ka kong Miriam Thangkhiew kala pynpaw ia ka jingsngew nguh ia u myntri rangbah ka jylla bad ia ki paidbah ka jylla kiba la ai ka jingkyrshan ia ki 10 ngut ki ban mih ban leit ialehkai ia khun kti sha Turkey. Kine ki ban leit la shai ka sngi ka dei ba ki mih khmat ia ka Ri India.
Haba kren ha ki lat pathai khubor ka kong Miriam kala ong ba kine kin mih la shai ka sngi na Shillong ban poi sha Mumbai por jan miet bad na katei ka jaka kin sa leit sha Turkey ryngkat u wei u nongialam na Meghalaya.
Ka kong Miriam kala pynpaw ia ka jingsngewnguh iaka tnad ialehkai ka jylla ruh kaba la ai ka jingkyrshan ha kane ka jingleit ki 10 ngut na kane ka jylla sha katei ka Ri ban ia khun ia kane ka jingialehkai khunkti.
U bah Hubert Paliar u wei na kiba la shah jied ban ia shim bynta ha katei ka jingialehkai ia khun kti kaba ki khot “Arm Wrestling” u la pyni da ki dak kren ba u pynpaw ia ka jingsngewnguh ia baroh ki nongkyrshan kiba la pynlong ia u ban ioh ban mih khmat ia ka Ri India ha katei ka jingialehkai.
U la ong ba u la pynkhreh bha ia lade bad u kyrmen ba un ioh ban rah ia ka jingjop ha katei ka jingiakop, u bah Hubert un ia shim bynta ki ar bynta ki jingialehkai iakhun kti, ka wei kaba dei kyllum lang ia baroh bad kawei kaba long kyrpang ia kiba don jingduna ha ka bor met.
